கண்ணீர் கடலில் தமிழகம்... பொதுமக்கள் அஞ்சலிக்காக தீவுத்திடலில் வைக்கப்படும் விஜயகாந்த் உடல்...லைவ் அப்டேட்ஸ்

மூத்த நடிகரும், அரசியல்வாதியுமான விஜயகாந்த் மறைவு செய்தியறிந்து வருத்தமடைந்தேன். அவரை இழந்து வாடும் குடும்பத்தினருக்கும், நண்பர்களுக்கும், ஆழ்ந்த இரங்கல் என ஆந்திர முன்னாள் முதல்-மந்திரி சந்திரபாபு நாயுடு கூறியுள்ளார்.

தேமுதிக தலைவர் விஜயகாந்த் உடலுக்கு அதிமுக பொதுச் செயலாளர் எடப்பாடி பழனிசாமி அஞ்சலி செலுத்தினார்.

நடிகர் விஜயகாந்த் உடலுக்கு கண்ணீர் மல்க பொதுமக்கள் அஞ்சலி செலுத்தி வருகின்றனர். விஜயகாந்த் உடலைப் பார்த்ததும் துக்கம் தாங்காமல் பொதுமக்கள் தலையிலும், வாயிலும் வயிற்றிலும் அடித்துக்கொண்டு கதறி அழும் காட்சி காண்போரை கண்கலங்க வைக்கிறது.

கேப்டனுக்கு மரியாதை செலுத்திய காவலர்கள்...!

விருகம்பாக்கம் வழியாக விஜயகாந்த் உடலை கொண்டு செல்லும் போது துப்பாக்கி ஏந்தி சல்யூட் அடித்து காவலர்கள் மரியாதை செலுத்தினர்.

ஆரூயிர் நண்பர் விஜயகாந்தின் முகத்தை கடைசியாக ஒருமுறை பார்க்க, ஷூட்டிங்கை பாதியில் நிறுத்தி சென்னை புறப்பட்டார் ரஜினிகாந்த்.

விஜயகாந்த் உடல், சாலிகிராமத்தில் உள்ள இல்லத்தில் இருந்து கோயம்பேட்டில் உள்ள தே.மு.தி.க. தலைமை அலுவலகத்திற்கு ஊர்வலமாக கொண்டு வரப்பட்டது. விஜயகாந்த் உடலை ஏற்றி வந்த வாகனம், சுமார் 2 மணி நேரம் மக்கள் வெள்ளத்தில் மெல்ல ஊர்ந்து கோயம்பேட்டில் உள்ள தே.மு.தி.க. தலைமை அலுவலகம் வந்தடைந்தது. வழிநெடுக சாலையின் இருபுறமும் மக்கள் திரண்டு நின்று விஜயகாந்துக்கு அஞ்சலி செலுத்தினர்.

கோயம்பேடு கட்சி அலுவலகத்தில் வைக்கப்பட்டுள்ள விஜயகாந்த் உடலுக்கு அரசியல் தலைவர்கள், திரை பிரபலங்கள், தொண்டர்கள், பொதுமக்கள் கண்ணீர் மல்க அஞ்சலி செலுத்திவருகின்றனர்.