இன்றைய முக்கிய செய்திகள் சில வரிகளில்.. 09-01-2025

சட்டசபையை பார்க்கும் போது வடிவேலுவின் 23-ம் புலிகேசி படத்தில் உள்ளது போல் முதல்-அமைச்சரை புகழ்வது தெரிகிறது. வடிவேலுவின் இடத்தை செல்லப்பெருந்தகை பிடித்துவிட்டதாக தமிழக பாஜக தலைவர் அண்ணாமலை கூறியுள்ளார்.

பெரியார் குறித்த கருத்து - சீமான் மீது தி.மு.க புகார்

பெரியார் குறித்து அவதூறாக பேசிய சீமான் மீது நடவடிக்கை எடுக்க வலியுறுத்தி சென்னை காவல் ஆணையர் அலுவலகத்தில் திமுக சட்டத்துறை துணை செயலாளர் புகார் மனு அளித்துள்ளார். சீமான் பேசியது தொடர்பான வீடியோ ஆதாரங்களோடு தி.மு.கவினர் புகார் அளித்துள்ளனர்.

யு.ஜி.சி.க்கு எதிரான முதல்-அமைச்சரின் தனித்தீர்மானத்திற்கு அ.தி.முக. ஆதரவு

தமிழக சட்டசபையின் 4-ம் நாள் கூட்டம் இன்று தொடங்கி நடந்து வருகிறது. இதில், யு.ஜி.சி.க்கு எதிராக தமிழக முதல்-அமைச்சர் மு.க. ஸ்டாலின் தனித்தீர்மானம் ஒன்றை கொண்டு வந்துள்ளார். முதல்-அமைச்சரின் இந்த தனித்தீர்மானத்திற்கு எதிர்க்கட்சியான அ.தி.முக. ஆதரவு தெரிவித்து உள்ளது.

இந்த விதிகளை மத்திய அரசு உடனே திரும்ப பெற வேண்டும் என வலியுறுத்தி உள்ளது. இந்த விவகாரத்தில் இந்திய அளவில் போராட்டம் முன்னெடுக்கப்பட வேண்டும் என்றும் தெரிவித்து உள்ளது.

த.வெ.க மாவட்ட செயலாளர்கள் கூட்டம் நாளை கூடுகிறது

தமிழக வெற்றிக்கழக மாவட்ட செயலாளர்கள் கூட்டம் நாளை நடைபெற உள்ளது. இதில், தமிழக வெற்றிக்கழகத்தின் தலைவர் விஜய் பங்கேற்க உள்ளார் என தகவல் வெளிவந்து உள்ளது. புதிதாக தேர்வு செய்யப்பட உள்ள மாவட்ட செயலாளர்கள் பனையூர் அலுவலகத்திற்கு அழைக்கப்பட்டு உள்ளனர்.

த.வெ.க மாவட்ட செயலாளர்கள், அணி தலைவர்கள் நாளை இறுதி செய்யப்பட உள்ளனர். இதற்காக வாக்கெடுப்பு முறை நடைபெறும். அதன் அடிப்படையில் த.வெ.க. மாவட்ட செயலாளர்கள் தேர்வு செய்யப்பட உள்ளனர்.

கலைஞர் மகளிர் உரிமைத் தொகையை இன்றே வழங்கிட முதலமைச்சர் உத்தரவு

தமிழர் திருநாளான பொங்கல் திருநாளை சிறப்பாகக் கொண்டாடிடும் வகையில் கலைஞர் மகளிர் உரிமைத் தொகை 1000 ரூபாயினை முன்கூட்டியே வழங்கிட முதலமைச்சர் மு.க.ஸ்டாலின் இன்று (9.1.2025) உத்தரவிட்டுள்ளார். இந்த உத்தரவின் மூலம் பயன்பெறும் 1 கோடியே 14 இலட்சத்து 61 ஆயிரம் பெண்களின் வங்கி கணக்குகளில் வரவு வைக்கும் பணிகள் இன்று காலை முதலே தொடங்கப்பட்டுள்ளது. அனைவருக்கும் இன்று அவர்களின் வங்கி கணக்குகளில் ரூ.1000/- வரவு வைக்கப்படுகிறது.

ஈரோடு கிழக்கு இடைத்தேர்தல் - வேட்பு மனு தாக்கல் நாளை தொடக்கம்

தமிழகத்தில் ஈரோடு கிழக்கு தொகுதி எம்.எல்.ஏ.வான காங்கிரசை சேர்ந்த ஈ.வி.கே.எஸ். இளங்கோவன் மறைவை தொடர்ந்து அந்த தொகுதி காலியானது என அறிவிக்கப்பட்டது.

இதனை தொடர்ந்து ஈரோடு கிழக்கு தொகுதிக்கான இடைத்தேர்தல் அறிவிக்கப்பட்டு உள்ளது. இதற்கான வேட்பு மனு தாக்கல் நாளை தொடங்குகிறது.