புயல் நாளை கரை கடக்கிறது.. பொதுமக்கள் வெளியே செல்ல வேண்டாம்

செங்கல்பட்டு, விழுப்புரத்திற்கு விரைந்த தேசிய பேரிடர் மீட்பு படை

புயல் முன்னெச்சரிக்கை பணியில் ஈடுபடும்படி தமிழ்நாடு பேரிடர் மேலாண்மை ஆணையம் கேட்டுக் கொண்டது. இதையடுத்து, அரக்கோணம் தேசிய பேரிடர் மீட்பு படை மைய துணை கமாண்டன்ட் சங்கர் பாண்டியன் உத்தரவின்பேரில் தலா 30 வீரர்கள் கொண்ட 2 குழுக்கள் ரப்பர் படகுகள், மரம் வெட்டும் கருவிகள், மருத்துவ உபகரணங்கள் உள்ளிட்ட நவீன கருவிகளுடன் செங்கல்பட்டு மற்றும் விழுப்புரம் பகுதிக்கு விரைந்தனர். மேலும், அரக்கோணம் தேசிய பேரிடர் மீட்பு படை மைய வளாகத்தில் 24 மணி நேர அவசர கட்டுப்பாட்டு மையம் செயல்படும் என மீட்பு படை மைய அதிகாரிகள் தெரிவித்தனர்.

இந்திய வானிலை ஆய்வு மையத்தின் தென் மண்டல தலைவர் பாலச்சந்திரன் செய்தியாளர்கள் சந்திப்பில் கூறியதாவது;

வங்கக்கடலில் உருவாகியுள்ள ‘பெஞ்சல்’ புயல் வடமேற்கு திசையில் நகர்ந்து நாளை பிற்பகல் காரைக்கால் - மாமல்லபுரம் இடையே கரையை கடக்கும். புயல் கரையை கடக்குபோது விழுப்புரம், கடலூர், புதுவை, சென்னை செங்கல்பட்டு, காஞ்சிபுரம், திருவள்ளூர் மாவட்டங்களில் கனமழை பெய்யும். சென்னை நகரம் மற்றும் புறநகர் பகுதிகளில் அதிகனமழைக்கு வாய்ப்புள்ளது.

தமிழகம், புதுவையில் அடுத்த 3 தினங்களுக்கு பரவலாக மழை பெய்யும். புயல் கரையை கடக்கும்போது மணிக்கு 90 கிலோமீட்டர் வேகத்தில் பலத்த காற்று வீசக்கூடும். மீனவர்கள் அடுத்த 2 நாட்களுக்கு கடலுக்கு செல்ல வேண்டாம்.”

இவ்வாறு அவர் கூறினார். 

புயல் உருவானதைத் தொடர்ந்து புதுச்சேரி கடற்கரை பகுதியை முதல்-அமைச்சர் ரங்கசாமி நேரில் பார்வையிட்டார். முன்னெச்சரிக்கை நடவடிக்கைகள் குறித்து அதிகாரிகளிடம் கேட்டறிந்தார்.

மெட்ரோ ரெயில் பார்க்கிங்குகளை பயன்படுத்த வேண்டாம்

சென்னை அரும்பாக்கம், செயின்ட் தாமஸ் மவுண்ட் மெட்ரோ நிலையங்களில் உள்ள பார்க்கிங்குகளை பயன்படுத்த வேண்டாம் என்று சென்னை மெட்ரோ ரெயில் நிர்வாகம் தெரிவித்துள்ளது. நாளை வரை தாழ்வான மற்றும் நீர் தேங்கும் மெட்ரோ பார்க்கிங்குகளில் வாகனங்களை நிறுத்த வேண்டாம் என அறிவுறுத்தப்பட்டுள்ளது. நாளை மெட்ரோ ரெயில் சேவை வழக்கம்போல தொடரும் என்பதால் பயணம் மேற்கொள்வதில் எந்த சிக்கலும் இருக்காது என தெரிவிக்கப்பட்டுள்ளது. 

துறைமுகங்களில் புயல் எச்சரிக்கை கூண்டு ஏற்றம்

* கடலூர், புதுச்சேரி துறைமுகங்களில் 7-ம் எண் புயல் எச்சரிக்கை கூண்டு ஏற்றப்பட்டுள்ளது.

* சென்னை, எண்ணூர், காட்டுப்பள்ளி துறைமுகங்களில் 6-ம் எண் புயல் எச்சரிக்கை கூண்டும், நாகை, காரைக்கால் துறைமுகத்தில் 5-ம் எண் புயல் எச்சரிக்கை கூண்டும்; பாம்பன், தூத்துக்குடி துறைமுகங்களில் 3-ம் எண் புயல் எச்சரிக்கை கூண்டும் ஏற்றப்பட்டுள்ளது