புயல் நாளை கரை கடக்கிறது.. பொதுமக்கள் வெளியே செல்ல வேண்டாம்

புதுவைக்கு அருகில் புயல் கரை கடக்க வாய்ப்பு

பெஞ்சல் புயல் மேற்கு-வடமேற்கு திசையில் நகர்ந்து காரைக்கால் மற்றும் மகாபலிபுரம் இடையே புதுச்சேரிக்கு அருகில் நாளை பிற்பகல் கடக்க வாய்ப்புள்ளது. புயல் கரை கடக்கும்போது மணிக்கு 70-80 கி.மீ வேகத்தில் காற்று வீசக் கூடும் என வானிலை ஆய்வு மையம் தெரிவித்துள்ளது.

ஆவடி, தாம்பரம், சோழிங்கநல்லூர், எண்ணூர், தண்டையார்பேட்டை ஆகிய இடங்களில் கனமழை பெய்து வருகிறது.

பொது மக்கள் வெளியில் செல்ல வேண்டாம்

தமிழக அரசு வெளியிட்டுள்ள செய்திக்குறிப்பு 

நாளை புயல் கரையைக் கடக்கும் போது கனமழைக்கும், புயல் காற்றுக்கும் வாய்ப்புள்ளதால், பொதுமக்கள் அனைவரும் அத்தியாவசியத் தேவை தவிர இதர பணிகளுக்காக வெளியில் வருவதைத் கண்டிப்பாக தவிர்த்து பாதுகாப்பாக வீடுகளில் இருக்குமாறு அறிவுறுத்தப்படுகிறது.

குறிப்பாக கடற்கரை, பொழுதுபோக்கு பூங்காக்கள், கேளிக்கை நிகழ்ச்சிகளுக்கு செல்வதை தவிர்க்குமாறு தமிழ்நாடு மாநில பேரிடர் மேலாண்மை ஆணையம் கேட்டுக் கொள்கிறது. மேலும், அரசின் அனைத்து பேரிடர் தடுப்பு நடவடிக்கைகளுக்கும் முழு ஒத்துழைப்பு நல்க பொதுமக்கள் கேட்டுக் கொள்ளப்படுகிறார்கள். 

ஓ.எம்.ஆர்., ஈ.சி.ஆர். பகுதிகளில் நாளை பொது போக்குவரத்து நிறுத்தம்

புயல் நாளை கரையை கடக்கும்போது கடலோர பகுதிகளில் அதிக காற்று வீசும் என வானிலை ஆய்வு மையம் தெரிவித்துள்ளது. இதன் காரணமாக நாளை பிற்பகலில் சென்னை ஓ.எம்.ஆர்., ஈ.சி.ஆர். பகுதிகளில் நாளை பொது போக்குவரத்து நிறுத்தப்பட உள்ளது.   

ஐ.டி. நிறுவன பணியாளர்களுக்கு அறிவுறுத்தல்

புயல் எச்சரிக்கை காரணமாக சென்னையில் ஐ.டி. நிறுவனங்களில் பணிபுரியும் பணியாளர்கள் நாளை வீட்டில் இருந்து பணிபுரியுமாறு அறிவுறுத்தல் வழங்கப்பட்டு உள்ளது. 

சென்னையில் பள்ளிகளுக்கு விடுமுறை

புயல் எச்சரிக்கை காரணமாக சென்னை மற்றும் செங்கல்பட்டு மாவட்டங்களிலும் பள்ளி மற்றும் கல்லூரிகளுக்கு விடுமுறை அறிவிக்கப்பட்டு உள்ளது. 

பெஞ்சல் புயலின் வேகம் அதிகரிப்பு

சென்னையில் இருந்து 250 கி.மீ தொலைவில் புயல் மையம் கொண்டுள்ளது. புயலின் வேகம் மணிக்கு 15 கிலோமீட்டராக அதிகரித்து உள்ளது. 

பள்ளி, கல்லூரிகளுக்கு விடுமுறை

* புயல் முன்னெச்சரிக்கை நடவடிக்கையாக காஞ்சிபுரம் மற்றும் திருவள்ளூர் மாவட்டங்களில் நாளை பள்ளி, கல்லூரிகளுக்கு விடுமுறை விடப்பட்டுள்ளது.