23-12-2024: இன்றைய முக்கிய செய்திகள் சில வரிகளில்

மறைந்த தேமுதிக தலைவர் விஜயகாந்தின் முதலாமாண்டு நினைவு தின கூட்டத்தில் பங்கேற்க முதல்-அமைச்சர் மு.க.ஸ்டாலினை தேமுதிக துணைப் பொதுச் செயலாளர் எல்.கே.சுதீஷ், விஜயகாந்தின் மகன் விஜய பிரபாகரன் ஆகியோர் நேரில் சந்தித்து அழைப்பு விடுத்துள்ளனர்.

நினைவு தினத்தன்று ஒரு கி.மீ தூர நினைவு தின பேரணி நடத்துவதற்கும் திட்டமிட்டுள்ளோம். காவல்துறையிடம் அனுமதி கேட்கப்பட்டுள்ளது. எதிர்க்கட்சித் தலைவர் எடப்பாடி பழனிச்சாமி, ஓ.பன்னீர் செல்வம் உள்பட அனைத்துக் கட்சி தலைவர்களையும் நேரில் அழைக்க உள்ளோம் என அண்ணா அறிவாலயத்தில் எல்.கே.சுதீஷ் செய்தியாளர்களிடம் தெரிவித்தார்.

மருத்துவ படிப்பு - சிறப்பு கவுன்சிலிங் நடத்த உத்தரவு

மருத்துவர்கள் காலியிடங்களை நிரப்ப இளநிலை மருத்துவ படிப்புகளுக்கான சிறப்பு கவுன்சிலிங் டிசம்பர் 30-ம் தேதிக்குள் நடந்த சுப்ரீம் கோர்ட்டு உத்தரவிட்டுள்ளது. நாட்டில் டாக்டர்கள் பற்றாக்குறை இருப்பதாக சுப்ரீம் கோர்ட்டு கருத்து தெரிவித்துள்ளது. லக்னோவை சேர்ந்த மருத்துவ கல்லூரி தாக்கல் செய்த வழக்கில் சுப்ரீம் கோர்ட்டு உத்தரவிட்டுள்ளது. 

திண்டிவனம் அருகே தண்டவாளத்தில் திடீர் விரிசல்

விழுப்புரம் மாவட்டம் திண்டிவனம் அருகே தண்டவாளத்தில் திடீர் விரிசல் ஏற்பட்டுள்ளது. ஓங்கூர் அருகே ரெயில் சென்று கொண்டிருந்த போது, தண்டவாளத்தில் இருந்து அதிக சத்தம் வந்ததால் ரெயிலை லோகோ பைலட் நிறுத்தினார். சென்னை எழும்பூரில் இருந்து புதுச்சேரி நோக்கி சென்று கொண்டிருந்த ரெயில் பாதி வழியில் நிறுத்தப்பட்டுள்ளது.

தண்டவாளத்தில் ஏற்பட்ட விரிசலை சரிசெய்யும் பணி ஊழியர்கள் தீவிரமாக ஈடுபட்டு வருகின்றனர். ஒரு மணி நேரத்திற்கும் மேலாக நிறுத்தி வைக்கப்பட்டுள்ள ரெயிலால் பயணிகள் அவதி அடைந்துள்ளனர். 

நீதிமன்றங்களில் துப்பாக்கி ஏந்திய போலீஸ்

தமிழ்நாடு முழுவதும் நீதிமன்றங்களில் துப்பாக்கி ஏந்திய போலீஸ் பாதுகாப்பு போடப்பட்டுள்ளது. நெல்லை நீதிமன்றம் வாயில் முன் இளைஞர் ஒருவர் படுகொலை செய்யப்பட்டநிலையில் நீதிமன்றங்களில் பலத்த பாதுகாப்பு போடப்பட்பட்டுள்ளது.

சேலம், நாமக்கல், தூத்துக்குடி, ராமநாதபுரம் ஆகிய 4 மாவட்டங்களில் பிற்பகல் 1 மணி வரை லேசான மழைக்கு வாய்ப்பு உள்ளதாக சென்னை வானிலை ஆய்வு மையம் தகவல் தெரிவித்துள்ளது.