லைவ்: - காசா மீதான தரைவழி படையெடுப்புக்கு தயார்: இஸ்ரேல் பிரதமர் அறிவிப்பு

காசா மீதான தரைவழி படையெடுப்புக்கு இஸ்ரேல் ராணுவம் தயாராக இருப்பதாக அந்நாட்டு பிரதமர் பெஞ்சமின் நெதன்யாகு தெரிவித்துள்ளார். காசா முனையில் உள்ள இஸ்ரேல் ராணுவ முகாமிற்கு சென்ற பெஞ்சமின் நெதன்யாகு, ராணுவ வீரர்களை சந்தித்து பேசினார். பின்னர் தனது எக்ஸ் சமூக வலைதளத்தில் பதிவு செய்துள்ள பெஞ்சமின் நெதன்யாகு, படையினருடன் இருக்கிறேன். படையெடுப்பு தங்களது படை தயாராக உள்ளது” என்று பதிவிட்டுள்ளார்.

இஸ்ரேல் போர்க் குற்றத்தில் ஈடுபட்டு வருவதாக ஹமாஸ் அமைப்பு குற்றம் சாட்டியுள்ளது. வெளியேறி சென்ற பொதுமக்கள் மீது தாக்குதல் நடத்தி போர் விதிகளை இஸ்ரேல் ராணுவம் மீறி வருவதாக ஹமாஸ் குற்றம் சாட்டியுள்ளது.

மருத்துவமனையில் உள்ளவர்கள் உடனே வெளியேற வேண்டும் என இஸ்ரேல் எச்சரிக்கை விடுத்துள்ள நிலையில், இஸ்லாமிய ஒத்துழைப்பு அமைப்பின் அவசர கூட்டத்திற்கு சவுதி அரேபியா அழைப்பு விடுத்துள்ளது.

காசாவில் தண்ணீரின்றி 20 லட்சம் மக்கள் தவிக்கும் சூழல் ஏற்பட்டு உள்ளது. ஏற்கனவே மின்சார விநியோகமும் பாதிக்கப்பட்டு உள்ள சூழலில் பாலஸ்தீனிய மக்கள் கடும் அவதியடைந்து உள்ளனர் என ஐ.நா. சபை கவலை தெரிவித்து உள்ளது.

உங்கள் அன்புக்குரியவர்கள் மீது அக்கறை இருந்தால் வெளியேறுங்கள் - பாலஸ்தீனர்களுக்கு இஸ்ரேல் 6 மணி நேரம் கெடு

வடக்கு காசாவில் உள்ள மக்கள் 24 மணி நேரத்தில் வெளியேறும்படி இஸ்ரேல் நேற்று எச்சரிக்கை விடுத்தது. இஸ்ரேல் தரைவழி தாக்குதல் நடத்தலாம் என்ற அச்சம் நிலவுவதால் காசாவின் வடக்கு பகுதியில் பாலஸ்தீனர்கள் தெற்கு பகுதிக்கு இடம்பெயர்ந்து வருகின்றனர். 11 லட்சம் பேரை இடம்பெற இஸ்ரேல் அறிவுத்தியுள்ள நிலையில் வடக்கு காசாவில் குழப்பமான சூழ்நிலை நிலவி வருகிறது.

இந்நிலையில், உங்கள் மீதும் உங்கள் அன்புக்குரியவர்கள் மீதும் அக்கறை இருந்தால் 6 மணி நேரத்தில் வெளியேறுங்கள் என வடக்கு காசாவில் உள்ள பாலஸ்தீனர்களுக்கு இஸ்ரேல் கெடு விதித்துள்ளது.

இது தொடர்பாக இஸ்ரேல் ராணுவ அரபு மொழி செய்தித்தொடர்பாளர் தனது டுவிட்டர் பக்கத்தில் வெளியிட்ட பதிவில், இன்று காலை 10 மணி முதல் மாலை 4 மணி வரை வடக்கு காசா முனையின் பெட் ஹனுன் நகரில் இருந்து தெற்கு காசா முனையின் கான் யுனிஸ் நகருக்கு பாலஸ்தீனர்கள் பாதுகாப்பாக செல்வதை இஸ்ரேல் பாதுகாப்புப்படை அனுமதிக்கிறது. பெட் ஹனுன் நகரில் இருந்து கான் யுனிஸ் நகருக்கு செல்ல மக்கள் அல் பஹர், அல் டின் ஆகிய தெருக்களை பயன்படுத்திக்கொள்ளலாம்.

உங்கள் மீதும் உங்கள் அன்புக்குரியவர்கள் மீதும் அக்கறை இருந்தால் தெற்கு காசா முனைக்கு சென்றுவிடுங்கள்’ என தெரிவித்துள்ளார்.

இஸ்ரேல் நேரப்படி தற்போது சரியாக 10 மணி ஆகிறது. இஸ்ரேலின் கெடு இந்திய நேரப்படி இன்று மாலை 6.30க்கு நிறைவடைகிறது என்பது குறிப்பிடத்தக்கது.

இஸ்ரேலிய பச்சிளம் குழந்தைகளை பிணைக்கைதிகளாக பிடித்து வைத்துள்ள ஹமாஸ் அமைப்பினர் - வீடியோ

இஸ்ரேலிய பச்சிளம் குழந்தைகளை ஹமாஸ் அமைப்பினர் பிணைக்கைதிகளாக பிடித்து வைத்திருக்கும் வீடியோ தற்போது வெளியாகி பரபரப்பை ஏற்படுத்தியுள்ளது. குழந்தைகளை ஹமாஸ் அமைப்பினர் பிணைக்கைதிகளாக வைத்துள்ள வீடியோவை டுவிட்டர் பக்கத்தில் வெளியிட்டுள்ள இஸ்ரேல் பாதுகாப்புப்படை, இவர்கள் பயங்கரவாதிகள், இவர்கள் தோற்கடிக்கப்படுவார்கள் என தெரிவித்துள்ளது.

120க்கும் மேற்பட்டோரை ஹமாஸ் பிணைக்கைதிகளாக பிடித்து வைத்துள்ளது - இஸ்ரேல் தகவல்

120க்கும் மேற்பட்டோரை ஹமாஸ் அமைப்பு காசாவில் பிணைக்கைதிகளாக பிடித்து வைத்துள்ளது என இஸ்ரேல் தெரிவித்துள்ளது.