மும்பை,

17-வது ஆசிய கோப்பை கிரிக்கெட் தொடர் செப்டம்பர் 9-ந்தேதி முதல் 28-ந்தேதி வரை ஐக்கிய அரபு அமீரகத்தில் நடைபெறுகிறது. இந்த தொடர் இம்முறை டி20 வடிவில் நடத்தப்பட உள்ளது. இந்த தொடரில் மொத்தம் 8 அணிகள் பங்கேற்கின்றன. அவை இரு பிரிவாக பிரிக்கப்பட்டுள்ளன.

'ஏ' பிரிவில் நடப்பு சாம்பியன் இந்தியா, பாகிஸ்தான், ஐக்கிய அரபு அமீரகம், ஓமன் அணிகளும், 'பி' பிரிவில் ஆப்கானிஸ்தான், வங்காளதேசம், இலங்கை, ஹாங்காங் அணிகளும் இடம் பெற்றுள்ளன. ஒவ்வொரு அணியும் மற்ற அணிகளுடன் தலா ஒரு முறை மோதும். லீக் சுற்று முடிவில் இரு பிரிவிலும் முதல் இரு இடங்களை பிடிக்கும் அணிகள் சூப்பர்4 சுற்றுக்கு முன்னேறும்.

இதில் ரசிகர்களை மிகுந்த எதிர்பார்ப்புக்கு உள்ளாக்கி இருக்கும் இந்தியா-பாகிஸ்தான் ஆட்டம் செப்.14-ந் தேதி துபாயில் நடைபெற உள்ளது. இரு நாடுகளுக்கும் இடையிலான பிரச்சினை காரணமாக இந்தியா-பாகிஸ்தான் கிரிக்கெட் அணிகள் இருதரப்பு தொடர்களில் மோதுவதை தவிர்த்து வருகின்றன. ஐ.சி.சி. மற்றும் ஆசிய கிரிக்கெட் வாரியங்கள் நடத்தும் தொடர்களில் மட்டுமே மோதி வருகின்றன. இதன் காரணமாக இந்த போட்டி அதிக எதிர்பார்ப்பை உண்டாக்கி உள்ளது.

இதனிடையே இந்த தொடரில் திட்டமிட்ட படி இந்தியா-பாகிஸ்தான் போட்டி நடைபெறுமா? என்ற கேள்வி பலரது மத்தியில் எழுந்தது. ஏனெனில் அண்மையில் முடிவடைந்த லெஜெண்ட்ஸ் லீக் தொடரில் பாகிஸ்தானுடன் விளையாட இந்திய அணி மறுத்தது. பஹல்காம் தாக்குதல் காரணமாக, ஜுலை 20-ம் தேதி நடக்கவிருந்த இந்தியா - பாகிஸ்தான் அணிகளுக்கு இடையிலான லீக் போட்டியில் விளையாட இந்தியா சாம்பியன்ஸ் அணி மறுப்பு தெரிவித்தது. பாகிஸ்தானுக்கு எதிரானப் போட்டியில் விளையாட ஷிகர் தவான், ஹர்பஜன் சிங், சுரேஷ் ரெய்னா, இர்பான் பதான், யூசுப் பதான் உள்ளிட்ட வீரர்கள் விலகுவதாக அறிவித்ததைத் தொடர்ந்து லீக் போட்டி ரத்து செய்யப்பட்டது. அதனை தொடர்ந்து அரையிறுதியிலும் இவ்விரு அணிகளும் நேருக்கு நேர் மோத வேண்டிய சூழல் உருவானது. அந்த போட்டியிலும் இந்திய அணி விலகியதால் பாகிஸ்தான் நேரடியாக இறுதிப்போட்டிக்கு முன்னேறியது.

அதன் காரணமாக இந்த ஆசிய கோப்பை தொடரிலும் பாகிஸ்தானுக்கு எதிராக இந்திய அணி விளையாடுமா? என்பது மிகப்பெரிய கேள்வியாகவே இருந்ததுது. பல இந்திய முன்னாள் வீரர்கள் ஆசிய கோப்பையில் பாகிஸ்தானுக்கு எதிராக இந்திய விளையாட கூடாது என கருத்து தெரிவித்தனர்.

இந்த சூழலில் ஆசிய கோப்பையில் இந்திய அணி பாகிஸ்தானுடன் விளையாட மத்திய விளையாட்டுத்துறை அமைச்சகம் அனுமதி கொடுத்துள்ளது. ஆனால் எக்காரணம் கொண்டும் இருதரப்பு தொடர்களில் பாகிஸ்தானுடன் விளையாடாது என்றும் மத்திய அமைச்சகம் கூறியுள்ளது.

இந்நிலையில் பாகிஸ்தானுடன் விளையாடி என்ன சாதிக்க போகிறீர்கள்? என்று இந்திய முன்னாள் வீரர் மனோஜ் திவாரி விமர்சித்துள்ளார்.

இது குறித்து அவர் பேசியது பின்வருமாறு:- “இந்தப் போட்டி நடக்கப் போவது எனக்கு கொஞ்சம் ஆச்சரியமாக இருக்கிறது. பஹல்காம் தாக்குதலில் ஏராளமான அப்பாவி பொதுமக்கள் கொல்லப்பட்டனர். அதைத் தொடர்ந்து நடந்த போருக்குப் பிறகு, இந்த முறை நாம் தகுந்த பதிலடி கொடுப்போம் என்று பல பேச்சுக்கள் நடந்தன. இருப்பினும், சில மாதங்களுக்குப் பிறகு, எல்லாம் மறந்துவிட்டது.

இந்த போட்டி நடப்பது என்னால் நம்ப முடியவில்லை. இங்கே ஒரு மனித உயிரின் மதிப்பு பூஜ்யமாக இருக்கிறது. பாகிஸ்தானுடன் விளையாடுவதன் மூலம் அவர்கள் என்ன சாதிக்க விரும்புகிறார்கள்? ஒரு மனித உயிரின் மதிப்பு விளையாட்டை விட உயர்ந்ததாக இருக்க வேண்டும். நான் இந்த போட்டியைப் பார்க்கவே மாட்டேன். அதில் எந்த கேள்வியும் இல்லை” என்று கூறினார்.