வாஷிங்டன்,

அமெரிக்காவில் சமீபத்தில் நடந்து முடிந்த ஜனாதிபதி தேர்தலில் குடியரசு கட்சி வேட்பாளராக போட்டியிட்ட டொனால்டு டிரம்ப் வெற்றி பெற்றார். இதையடுத்து அமெரிக்காவின் 47-வது ஜனாதிபதியாக வரும் ஜனவரி 20-ந்தேதி டிரம்ப் பதவியேற்க உள்ளார். இந்த நிலையில் ஜனாதிபதியாக பதவியேற்ற பின்னர், நிர்வாக ரீதியாக மேற்கொள்ளப்பட இருக்கும் மாற்றங்கள் மற்றும் திட்டங்கள் குறித்து டிரம்ப் அறிவித்து வருகிறார்.

அந்த வகையில், ஜனாதிபதியாக பதவியேற்ற பின்னர் கனடா மற்றும் மெக்சிகோவில் இருந்து இறக்குமதியாகும் பொருட்களுக்கு 25 சதவீதம் வரி விதிக்கப்படும் என டிரம்ப் அறிவித்துள்ளார்.

சட்டவிரோத குடியேற்றம் மற்றும் பென்டானில் உள்ளிட்ட போதைப்பொருள் கடத்தல் குறித்த கவலைகளைக் காரணம் காட்டி, கனடா மற்றும் மெக்சிகோவிலிருந்து இறக்குமதி செய்யப்படும் பொருட்களுக்கு 25 சதவீத வரியையும், சீனாவிலிருந்து வரும் பொருட்களுக்கு 10 சதவீத வரியையும் அமெரிக்க அதிபர் டொனால்ட் டிரம்ப் அறிவித்துள்ளார்.

அமெரிக்கர்களைப் பாதுகாக்க வேண்டியதன் அவசியத்தையும், பிரசார வாக்குறுதியை நிறைவேற்ற வேண்டியதன் அவசியத்தையும் வலியுறுத்தி, அமெரிக்க அதிபர் சர்வதேச அவசர பொருளாதார அதிகாரச் சட்டத்தின் (IEEPA) கீழ் நடவடிக்கை எடுத்துள்ளார்.

சட்டவிரோத குடியேற்றம் மற்றும் போதைப்பொருள் கடத்தலால் ஏற்படும் அச்சுறுத்தல்களிலிருந்து அமெரிக்க குடிமக்களைப் பாதுகாக்க இந்த வரிகள் செயல்படுத்தப்பட்டுள்ளதாக டிரம்ப் கூறினார்.

இது தொடர்பாக அவர் தனது ட்ரூத் சோஷியல் சமூக வலைதள பக்கத்தில் வெளியிட்டுள்ள பதிவில் கூறியிருப்பதாவது:-

"இன்று, மெக்சிகோ மற்றும் கனடாவிலிருந்து இறக்குமதி செய்யப்படும் பொருட்களுக்கு 25சதவீதம் வரி (கனடா எரிசக்திக்கு 10சதவீதம்) மற்றும் சீனா மீது 10 சதவீதம் கூடுதல் வரியை அமல்படுத்தியுள்ளேன். சட்டவிரோத வெளிநாட்டினர் மற்றும் பென்டானில் உட்பட நமது குடிமக்களைக் கொல்லும் கொடிய மருந்துகளின் முக்கிய அச்சுறுத்தல் காரணமாக இது சர்வதேச அவசர பொருளாதார அதிகாரச் சட்டம் (IEEPA) மூலம் செய்யப்பட்டது. நாம் அமெரிக்கர்களைப் பாதுகாக்க வேண்டும், மேலும் அனைவரின் பாதுகாப்பையும் உறுதி செய்வது ஜனாதிபதியாக எனது கடமை. சட்டவிரோத வெளிநாட்டினர் மற்றும் போதைப்பொருட்களின் வெள்ளம் நமது எல்லைகளில் கொட்டுவதைத் தடுப்பதாக எனது பிரசாரத்தில் நான் உறுதியளித்தேன், மேலும் அமெரிக்கர்கள் பெருமளவில் அதற்கு ஆதரவாக வாக்களித்தனர்," என்று டிரம்ப் தெரிவித்துள்ளார்.