தென்கிழக்கு வங்கக்கடலில் உருவானது குறைந்த காற்றழுத்த தாழ்வுப் பகுதி

சென்னை,

தென்கிழக்கு வங்கக்கடலில் குறைந்த காற்றழுத்த தாழ்வுப் பகுதி உருவாகி உள்ளதாக இந்திய வானிலை ஆய்வு மையம் தெரிவித்துள்ளது. மேலும் இது அடுத்த 2 நாட்களில் மேற்கு - வடமேற்கு திசையில் நகர்ந்து, தெற்கு வங்கக்கடலின் மத்திய பகுதிகளில் காற்றழுத்த தாழ்வு மண்டலமாக வலுப்பெற கூடும் என்றும் தெரிவிக்கப்பட்டுள்ளது.

தமிழ்நாட்டில் வடகிழக்கு பருவமழை தீவிரமடைந்து வருகிறது. கடந்த ஒரு வாரமாக டெல்டா, தென் மற்றும் உள்மாவட்டங்களில் பரவலாக மழை பெய்து வருகிறது. இதன் தொடர்ச்சியாக தெற்கு அந்தமான் மற்றும் அதனை ஒட்டிய பகுதிகளில் வளிமண்டல மேலடுக்கு சுழற்சி உருவாகி உள்ளது.

இதன் காரணமாக தென் கிழக்கு வங்கக்கடல் பகுதியில் இன்று பிற்பகலுக்குள் புதிய காற்றழுத்த தாழ்வுப்பகுதி உருவாகக்கூடும் என வானிலை ஆய்வு மையம் தெரிவித்திருந்தது. இது அடுத்த 2 நாட்களில் (திங்கட்கிழமை) காற்றழுத்த தாழ்வு மண்டலமாகவும் வலுப்பெற்று தெற்கு வங்கக்கடல் பகுதியை நோக்கி நகர்ந்து வரும்.

அதன் பின்னர் 26ந்தேதி தீவிர காற்றழுத்த தாழ்வு மண்டலமாக வலுவடைந்து, வட இலங்கை–டெல்டா மாவட்டங்களுக்கு இடையே நகரக்கூடும். 24 மணி நேரம் முதல் 30 மணி நேரம் வரை அதே பகுதியில் நிலவக்கூடும். அதனை தொடர்ந்து தீவிர காற்றழுத்த தாழ்வு மண்டலமாகவோ அல்லது புயலாகவோ மாறுவதற்கான வாய்ப்புகள் உள்ளது என்றும் தெரிவிக்கப்பட்டிருந்தது.

இதன்மூலம் தமிழகத்தில் இன்று மற்றும் நாளை ஒருசில மாவட்டங்களில் மிதமான மழை முதல் கனமழை பெய்யக்கூடும். மேலும் 25ந்தேதி மாலையில் டெல்டா மாவட்டங்களில் மழை தொடங்கி 26, 27 மற்றும் 28-ந் தேதிகளில் கடலூர், தஞ்சாவூர், திருவாரூர், நாகப்பட்டினம், மயிலாடுதுறை, புதுக்கோட்டை, காஞ்சிபுரம், செங்கல்பட்டு, விழுப்புரம், ராமநாதபுரம் மாவட்டங்களின் ஓரிரு இடங்களில் கன முதல் மிக கனமழை பெய்ய வாய்ப்பு உள்ளது என்றும் தெரிவிக்கப்பட்டுள்ளது.

இதனிடையே தாழ்வு மண்டலமோ அல்லது புயல் சின்னமோ வருகிற 28-ந் தேதி இரவு புதுச்சேரிக்கும், கோடியக்கரைக்கும் இடையே கரையை கடக்கக்கூடும் என்றும், சென்னை முதல் தஞ்சாவூர் வரையிலான கடலோர மாவட்டங்கள் இந்த தேதிகளில் எச்சரிக்கையுடன் இருக்க வேண்டும் என்றும் தெரிவிக்கப்பட்டுள்ளது. கரையை கடந்ததும், 29-ந் தேதியில் இருந்து உள், மேற்கு மற்றும் தென் மாவட்டங்களில் மழை தொடங்கும். அந்தவகையில் இந்த அமைப்பு வருகிற 25-ந் தேதி தொடங்கி அடுத்த மாதம் (டிசம்பர்) 2-ந் தேதி வரை தமிழ்நாட்டில் பரவலாக மழை தொடரும் என வானிலை ஆய்வாளர்கள் தெரிவிக்கின்றனர்.