இன்றைய முக்கிய செய்திகள் சில வரிகளில்.. 18-12-2024

அம்பேத்கர் குறித்த அமித்ஷாவின் கருத்து கண்டிக்கத்தக்கது. வணங்கப்பட வேண்டிய தலித்தலைவர் ஒருவர் அவமானப்படுத்தப்பட்டுள்ளார் என்று காங்கிரஸ் தலைவர் மல்லிகார்ஜுன கார்கே கூறியுள்ளார். 

அண்ணாமலை பல்கலை. துணைவேந்தரை நியமனம் செய்வதற்கான தேடுதல் குழுவைத் திரும்ப பெறுமாறு தமிழக அரசுக்கு கவர்னர் ஆர்.என்.ரவி உத்தரவிட்டுள்ளார். அரசு நியமித்த தேடுதல் குழுவில் யுஜிசி பிரதிநிதி இல்லாமல் இருப்பது விதிகளுக்கு முரணானது என கவர்னர் ஆர்.என்.ரவி கூறியுள்ளார்.

வேலூர் அருகே சிறுத்தை தாக்கி இளம்பெண் உயிரிழப்பு?

வேலூர் கே.வி.குப்பம் அருகே துருவம் கிராமத்தில் சிறுத்தை தாக்கி 23 வயது இளம்பெண் உயிரிழந்ததாக தகவல் வெளியாகி உள்ளது. வீட்டில் இருந்து சுமார் 100 மீட்டர் தொலைவில் ரத்த வெள்ளத்தில் இளம்பெண் உயிரிழந்ததாக கூறப்படுகிறது. சம்பவ இடத்திற்கு கே.வி.குப்பம் போலீசார் விரைந்துள்ளனர். துருவம் என்ற கிராமத்தில் சிறுத்தை தாக்கி இளம்பெண் உயிரிழந்ததாக போலீசார் தரப்பில் கூறப்படுகிறது.

மத்திய மந்திரி அமித்ஷாவுக்கு தவெக தலைவர் விஜய் கண்டனம்

எங்கள் கொள்கைத்தலைவரை அவமதிப்பதை ஒருபோதும் அனுமதிக்க முடியாது என்று த.வெ.க. தலைவர் விஜய் மத்திய மந்திரி அமித்ஷாவுக்கு கண்டனம் தெரிவித்துள்ளார். யாரோ சிலருக்கு வேண்டுமானால் அம்பேத்கர் பெயர் ஒவ்வாமையாக இருக்கலாம். ஒப்பற்ற அரசியல் மற்றும் அறிவுலக ஆளுமை அம்பேத்கர் என்று தவெக தலைவர் விஜய் கூறியுள்ளார். 

திருப்பத்தூர் மாவட்டம் வாணியம்பாடி அடுத்த ஆலங்காயம், காவலூர் மற்றும் சுற்றுவட்டாரப்பகுதிகளில் கனமழை பெய்து வருகிறது. 

சாகித்ய அகாடமி விருது அறிவிக்கப்பட்டுள்ள எழுத்தாளர் ஆ.இரா.வேங்கடாசலபதிக்கு முதல்-அமைச்சர் மு.க.ஸ்டாலின் வாழ்த்து தெரிவித்துள்ளார். 

கூடங்குளம் அருகே கல்குவாரியில் விபத்து

நெல்லை மாவட்டம் கூடங்குளம் அருகே இருக்கன் துறையில் உள்ள கல்குவாரியில் மண்சரிவு ஏற்பட்டு விபத்து ஏற்பட்டுள்ளது. சம்பவ இடத்திற்கு மீட்பு குழுவினர், வட்டாட்சியர், காவல் துறையினர் விரைந்துள்ளனர். மண்சரிவில் 3 பேர் சிக்கி இருப்பதாக முதற்கட்ட தகவல் வெளியாகி உள்ளது.

ஒரே நாடு ஒரே தேர்தல் தொடர்பாக மத்திய அரசு அமைக்கும் நாடாளுமன்ற கூட்டுக்குழுவில் பிரியங்கா காந்திக்கு இடம் என தகவல் வெளியாகி உள்ளது. கூட்டுக்குழுவில் காங்கிரஸ் சார்பில் பிரியங்கா காந்தி, மணீஷ் திவாரி உள்ளிட்டோர் இடம்பெறுவார்கள் என காங்கிரஸ் வட்டாரங்கள் தெரிவிக்கின்றன.

புதுச்சேரி கடலில் ஏற்பட்டுள்ள சீற்றம் காரணமாக, கடற்கரையில் சுற்றுலாப் பயணிகளுக்கு போலீசார் தடை விதித்துள்ளனர். பாதுகாப்புப் பணியில் ஈடுபட்டுள்ள போலீசார், சுற்றுலாப் பயணிகளிடம் அறிவுறுத்தி அவர்களை வெளியேற்றி வருகின்றனர்.

புதுச்சேரியில் ஜனவரி 1-ம் தேதி முதல் தலைக்கவசம் கட்டாயமாகிறது. விதியை மீறினால் ரூ.1000 அபராதம், 3 மாதங்களுக்கு ஓட்டுநர் உரிமம் ரத்து என்று அறிவிக்கப்பட்டுள்ளது.