இன்றைய முக்கிய செய்திகள் சில வரிகளில்.. 16-01-2025

டெல்லி நோக்கி மீண்டும் பேரணி.. தயாராகும் விவசாயிகள்

பயிர்களுக்கு குறைந்தபட்ச ஆதரவு விலைக்கான சட்டப்பூர்வ உத்தரவாதம் உள்ளிட்ட கோரிக்கைகளை வலியுறுத்தி வரும் 21-ம் தேதி ஷம்பு எல்லையில் இருந்து 101 விவசாயிகள் டெல்லி நோக்கி பேரணியை தொடங்க உள்ளதாக விவசாய சங்க தலைவர் சர்வான் சிங் பாந்தர் தெரிவித்துள்ளார்.

இதற்கு முன்பு டிசம்பர் 6, டிசம்பர் 8 மற்றும் டிசம்பர் 14 என மூன்று முறை ஷம்பு எல்லையில் இருந்து டெல்லி நோக்கி விவசாயிகள் பேரணியாக செல்ல முயன்றனர். அப்போது அவர்களை அரியானா போலீசார் தடுத்து நிறுத்தியது குறிப்பிடத்தக்கது.

டெல்லி சட்டசபை தேர்தலில் நாங்கள் வெற்றி பெற்றால், ரூ.500-க்கு சமையல் கியாஸ் சிலிண்டர், இலவச ரேசன் பொருட்கள் மற்றும் 300 யூனிட் இலவச மின்சாரம் வழங்கப்படும் என காங்கிரஸ் கட்சி தெரிவித்து உள்ளது.

விண்ணில் செயற்கைக்கோள்களை இணைக்கும் இஸ்ரோவின் ஸ்பேடெக்ஸ் திட்டம் வெற்றி பெற்றது பற்றி இஸ்ரோவின் முன்னாள் விஞ்ஞானி மயில்சாமி அண்ணாதுரை கூறும்போது, நான் மிகுந்த மகிழ்ச்சி அடைகிறேன்.

இந்த சாதனையை செய்து முடித்த ஒட்டுமொத்த குழுவினருக்கும் வாழ்த்துகள் என தெரிவித்து கொண்டார்.  இந்த திட்டத்தின் வெற்றியானது, சந்திரயான்-4 திட்டத்திற்கு நிறைய உதவும் என்றும் அவர் கூறியுள்ளார்.

அலங்காநல்லூர் ஜல்லிக்கட்டு போட்டியில் இதுவரை 6 மாடுபிடி வீரர்கள், 4 காளை உரிமையாளர்கள் மற்றும் 3 பார்வையாளர்கள் என 13 பேர் காயம் அடைந்து உள்ளனர்.

உத்தர பிரதேசத்தில் மகா கும்பமேளா நிகழ்ச்சிக்கு வந்திருந்த துறவிகளில் ஒருவர், தரையில் குவித்து, பரப்பி வைக்கப்பட்டு இருந்த முட்கள் மீது சாய்ந்து படுத்து, சுற்றியிருந்தவர்களை ஆச்சரியமடைய செய்துள்ளார்.

விண்ணில், செயற்கைக்கோள்களை இணைக்கும் பணி வெற்றியடைந்து உள்ளதுடன், அவற்றை நிலைப்படுத்தும் பணியும் வெற்றி பெற்று உள்ளது. ஒட்டுமொத்த குழுவினருக்கும் வாழ்த்துகள். இந்தியாவுக்கும் வாழ்த்துகள் என இஸ்ரோ வெளியிட்டு உள்ள எக்ஸ் சமூக ஊடக பதிவு தெரிவிக்கின்றது.

இதேபோன்று, செயற்கைக்கோள்களை இணைத்த பின்னர், அவற்றை கட்டுப்படுத்தும் பணியும் வெற்றி பெற்றுள்ளது. வரவிருக்கிற நாட்களில், செயற்கைக்கோள்களை பிரிக்கும் பணி மற்றும் மின்சார பரிமாற்ற சோதனைகளும் மேற்கொள்ளப்படும் என தெரிவிக்கப்பட்டு உள்ளது.

நெல்லையில் வடலிவிளை பகுதியில் இளவட்டக்கல் தூக்கும் சாகச நிகழ்ச்சி நடந்தது. இதில் திரளான இளைஞர்கள் கலந்து கொண்டனர். அவர்களில் சிலர் இளவட்டக்கல்லை முன்னால் தூக்கி, தோளின் மீது வைத்து பின்னால் எறிந்தும், ஒரு சிலர் அதனை தூக்கி ஒரு கையில் வைத்து, உயரே தூக்கி பிடித்தும் சாகசத்தில் ஈடுபட்டனர்.

ஆண்களுக்கு பெண்கள் இளைப்பில்லை காண் என்பதற்கேற்ப, பெண்களும் இளவட்டக்கல்லை தூக்கும் நிகழ்ச்சியில் துணிச்சலாக பங்கேற்றனர்.