கோவில் கும்பாபிஷேகம்: சென்னை புரசைவாக்கத்தில் இன்று போக்குவரத்து மாற்றம்

சென்னை,

சென்னை புரசைவாக்கத்தில் உள்ள கங்காதீஸ்வரர் கோவிலில் இன்று கும்பாபிஷேகம் நடைபெறுவதை முன்னிட்டு அந்த பகுதியில் போக்குவரத்து மாற்றம் செய்யப்படுவதாக சென்னை போக்குவரத்து போலீசார் தெரிவித்துள்ளனர். இது தொடர்பாக வெளியிடப்பட்டுள்ள அறிக்கையில் தெரிவிக்கப்பட்டிருப்பதாவது:-

கங்காதீஸ்வரர் கோவில் தெருவில் அமைந்துள்ள கங்காதீஸ்வரர் திருக்கோவில் மஹா கும்பாபிஷேகம் இன்று காலை 05.00 மணி முதல் நடைபெறவுள்ளதால், கோவிலுக்கு சாமி தரிசனம் செய்ய வரும் பக்தர்களின் வசதிக்காகவும், வாகன ஓட்டிகளின் வசதிக்காகவும், இன்று (28.11.2024) காலை 05.00 மணி முதல் 12.00 மணி வரையில் பின்வரும் போக்குவரத்து மாற்றங்கள் செய்யப்படுகிறது.

1. காலை 05.00 மணி முதல் மஹாகும்பாபிஷேகம் முடியும் வரை கங்காதீஸ்வரர் கோவில் தெரு வழியாக வாகனங்கள் அனுமதிக்கப்படாது.

2. மில்லர்ஸ் சாலை சந்திப்பிலிருந்து கங்காதீஸ்வரர் கோவில் தெருவை நோக்கி வரும் வாகனங்கள் நேராக டவ்டன் பாலம் (அல்லது) சர்வீஸ் சாலை, டவ்டன் சந்திப்பு (வலது) ரிதர்டன் சாலை வழியாக ஈவிஆர் பெரியார் சாலையை அடையலாம்.

3. டவ்டன் சந்திப்பிலிருந்து கங்காதீஸ்வரர் கோவில் தெருவை நோக்கி வரும் வாகனங்கள் ஈவிஆர் பெரியார் சாலையை அடைய ரிதர்டன் சாலையில் திருப்பி விடப்படும்.

4. ஜெர்மியா சாலையில் இருந்து வரும் வாகனங்கள் டவ்டன் பாலத்தில் அனுமதிக்கப்படாது. அந்த வாகனங்கள் சர்வீஸ் ரோடு மற்றும் டவ்டன் சந்திப்பு வழியாக (இடது) ரிதர்டன் சாலைக்கு செல்லலாம்.

5 பெரம்பூர் பேரக்ஸ் சாலையில் இருந்து கங்காதீஸ்வரர் கோவில் தெருவை நோக்கி வரும் வாகனங்கள் இடதுபுறம் நாராயணகுரு சாலைக்கு சென்று (வலது) ஹன்டர்ஸ் சாலை, ஈவிகே சம்பத் சாலை, ஈவிஆர் பெரியார் சாலைக்கு திருப்பி விடப்படும். வாகன ஓட்டிகள் ஒத்துழைப்பு நல்குமாறு கேட்டுக்கொள்ளப்படுகிறார்கள். இவ்வாறு அதில் தெரிவிக்கப்பட்டுள்ளது.