சென்னை,

துணை முதலமைச்சர் உதயநிதி ஸ்டாலின் இன்று ரூ.49.49 கோடி ரூபாய் மதிப்பீட்டில் பல்வேறு மாவட்டங்களில் விளையாட்டு வளாகங்களை மேம்படுத்துதல், கூடுதல் விளையாட்டு மையங்கள், விளையாட்டு விடுதிகள், பாரா விளையாட்டு அரங்கங்கள், விளையாட்டு உட்கட்டமைப்புகளை புதுப்பித்தல் உள்ளிட்ட 11 விளையாட்டு உள்கட்டமைப்பு மேம்பாட்டு பணிகளுக்கு அடிக்கல் நாட்டினார்.

தமிழ்நாடு துணை முதலமைச்சர் உதயநிதி ஸ்டாலின் அவர்கள் தலைமைச் செயலகத்தில், இளைஞர் நலன் மற்றும் விளையாட்டு மேம்பாட்டுத் துறை சார்பில் சென்னை ஜவஹர்லால் நேரு விளையாட்டரங்கில் 24.70 கோடி ரூபாய் மதிப்பீட்டில் உயர் செயல்திறன் கொண்ட மாணவர் விளையாட்டு விடுதியுடன் கூடிய பயிற்சி மையம் அமைக்கும் பணிக்கு அடிக்கல் நாட்டினார். அதன் விபரம் பின்வருமாறு;

தேசிய மற்றும் சர்வதேச தடகள விளையாட்டுப் போட்டிகளின் பதக்கப் பட்டியலில் தமிழ்நாடு முக்கிய இடம் பெற்று, ஈட்டி எறிதல், குண்டு எறிதல், வட்டு எறிதல் மற்றும் சங்கிலி குண்டு எறிதல் போன்ற பிரத்யேக எறிதல் விளையாட்டுப் போட்டிகளில் சிறந்து விளங்குகிறது. எனவே எறிதல் விளையாட்டு வீரர்களுக்காக தேசிய மற்றும் சர்வதேச போட்டிகளுக்கான அரங்கமாக பயன்படுத்தும் வகையில் சென்னை ஜவஹர்லால் நேரு உள்விளையாட்டரங்கின் மைதானத்தில் ரூ.2.49 கோடி ரூபாய் மதிப்பீட்டில் ஒரு புதிய எறிதல் மையம் அமைக்கும் பணிக்கு அடிக்கல் நாட்டினார்.

சென்னை ஜவஹர்லால் நேரு விளையாட்டரங்கில் ரூ.3.49 கோடி ரூபாய் மதிப்பீட்டில் கூடைப்பந்து மற்றும் கையுந்துப்பந்து ஆகிய விளையாட்டுகளுக்காக நிழற்கூரையுடன், வெளியே கோணப்பட்ட மெஷ், அக்ரிலிக் தரையமைப்பு, ஒளியமைப்புகளுடன் கூடிய இரண்டு நிலையான கூடைப்பந்து மைதானங்கள் மற்றும் இரண்டு கையுந்துப்பந்து மைதானங்கள் ஏற்படுத்த அடிக்கல் நாட்டினார்.

சேப்பாக்கத்தில் உள்ள அறிஞர் அண்ணா நீச்சல் குளத்தினை வடிகட்டி அமைப்புடன் முன்வயப்பட்ட கட்டமைப்பு முறையை பயன்படுத்தி ரூ.2.74 கோடி ரூபாய் மதிப்பீட்டில் மறுசீரமைத்து மேம்படுத்த அடிக்கல் நாட்டினார்.

சென்னை முகப்பேரில் உள்ள தமிழ்நாடு விளையாட்டு மேம்பாட்டு ஆணையத்தின் மேசைப் பந்து விளையாட்டு வளாகத்தினை 2.97 கோடி ரூபாய் மதிப்பீட்டில் புரனமைக்கும் பணிக்கு அடிக்கல் நாட்டினார்.

மதுரையில் உள்ள மாவட்ட விளையாட்டு வளாகத்தில் 1,300 சதுர அடி பரப்பளவில் ரூ.5.60 கோடி ரூபாய் மதிப்பீட்டில் 100 மாணவர்களுக்கான தங்கும் வசதி, உணவறை மற்றும் அத்தியாவசிய உட்கட்டமைப்புகளுடன் தரைத்தளம் மற்றும் மூன்று தளங்களுடன் கூடிய புதிய விளையாட்டு விடுதி அமைக்கும் பணிக்கு அடிக்கல் நாட்டினார்.

மேலும், திருவள்ளுர், திருவண்ணாமலை, தஞ்சாவூர், திண்டுக்கல் மற்றும் கிருஷ்ணகிரி ஆகிய 5 மாவட்டங்களில் தலா ரூ.1.50 கோடி ரூபாய் மதிப்பீட்டில் என மொத்தம் ரூ.7.5 கோடி ரூபாய் மதிப்பீட்டில் பாரா விளையாட்டு மைதானங்கள் அமைத்தல் உள்ளிட்ட பணிகளுக்கும் உட்பட ரூ.49.49 கோடி ரூபாய் மதிப்பீட்டில் 11 விளையாட்டு உள்கட்டமைப்பு மேம்பாட்டு பணிகளுக்கு அடிக்கல் நாட்டினார்.

இந்நிகழ்ச்சியில் அமைச்சர்கள் கே. ஆர். பெரியகருப்பன், மா. சுப்பிரமணியன், பி.கே. சேகர்பாபு மற்றும் உயர் அலுவலர்கள் கலந்து கொண்டனர்.