வெளிமாநிலத்தவர் தமிழகம் வந்தால் ஊர் பெயர்களை எப்படி புரிந்து கொள்வார்கள்? - தமிழிசை கேள்வி

சென்னை,

மும்மொழிக் கொள்கை மற்றும் இந்தி திணிப்புக்கு எதிர்ப்பு தெரிவிக்கும் வகையில், திமுகவை சேர்ந்தவர்கள் கோவை மாவட்டம் பொள்ளாச்சி, நெல்லை மாவட்டம் பாளையங்கோட்டை மற்றும் தென்காசி மாவட்டம் சங்கரன்கோவில் ரெயில் நிலையத்தில் பெயர் பலகையில் இடம் பெற்றிருந்த இந்தி எழுத்துக்களை அழித்தனர்.

இந்த நிலையில், சென்னை ரெயில்நிலையத்தில் பாஜக மூத்த தலைவர் தமிழிசை சவுந்தரராஜன் செய்தியாளர்களை சந்தித்தார். அப்போது ரெயில் நிலைய பெயர் பலகையில் இந்தி எழுத்துக்கள் அழிக்கப்பட்டது குறித்து செய்தியாளர்கள் கேள்வியெழுப்பினர். அதற்கு பதிலளித்து தமிழிசை கூறியதாவது;

"அரசியலுக்காக குழந்தைகளை பயன்படுத்துவது ஏற்றுக்கொள்ள முடியாது. தேசிய கல்விக் கொள்கையில் தாய்மொழிக்கு முக்கியத்துவம் அளிக்கப்படுவதோடு திறன் வளர்ப்பு, தொழில்நுட்ப அறிவு, விரிவுபடுத்தப்பட்ட கல்வி என அரசு மாணவர்களுக்கு தேவையானவை இருக்கிறது. தமிழக முதல்வரின் பேரன்கள் எங்கு படிக்கிறார்கள் என்பது அனைவருக்கும் தெரியும்.

தங்கள் குழந்தைகளை இந்தி படிக்க வைத்துவிட்டு பொது இடத்தில் உள்ள பலகையில் இந்தி எழுத்தை அழிக்கின்றனர். பொதுமக்களின் சொத்துக்களை சேதப்படுத்துவதற்கு இவர்களுக்கு உரிமை கிடையாது. இந்தி இல்லாவிட்டால் வெளிமாநிலத்தவர் எப்படி ஊர் பெயர்களை புரிந்து கொள்வர்.

பாஜகவிற்கு அக்கறை இல்லை என்பதை போல எடுத்துச்செல்லாதீர்கள். இருமொழிக் கொள்கை மூலம் ஆங்கிலத்தை வளர்த்து உலக அரங்கில் பிரபலமானோம் என முதல்-அமைச்சர் கூறுகிறார். அப்போது தமிழை வளர்க்கவில்லை. ஆங்கிலத்தை வளர்ப்பார்களே தவிர, இன்னொரு இந்திய மொழியை வளர்க்க மாட்டார்கள் என தெரிகிறது. மொழிப்பிரச்சினையை வைத்துக்கொண்டு திமுக ஆட்சியில் அதிகரித்துவரும் பாலியல் குற்றங்கள் கொலைகள் போன்றவற்றை மறைக்கப் பார்க்கிறார்கள்.

மத்திய அரசு கொண்டு வந்த நல்ல திட்டங்களான விஸ்வகர்மா திட்டம், நீட் ஆகியவற்றை ஸ்டாலின் தடுக்கிறார். பிரதமரின் மருந்தகத் திட்டத்தினை மக்கள் மருந்தகம் என பெயர் மாற்றி அமல்படுத்தி உள்ளனர். மக்களை வஞ்சிக்கும் அரசாக திமுக அரசு செயல்பட்டு வருகிறது."

இவ்வாறு அவர் பேசினார்.