பாட்னா,

பீகார் சட்டசபை தேர்தலையொட்டி, நாளந்தா மாவட்டம் பக்தியார்பூர் தொகுதியில் நடந்த பா.ஜனதா கூட்டணி தேர்தல் பிரசார கூட்டத்தில் பா.ஜனதா தலைவரும், மத்திய மந்திரியுமான ஜே.பி.நட்டா பங்கேற்றார்.

பிரசாரத்தில் அவர் பேசியதாவது:-

காங்கிரசும், ராஷ்டிரீய ஜனதாதளமும் மக்கள் நலனை பற்றி கவலைப்படுவது இல்லை. லாலுபிரசாத் யாதவுக்கு தனது மகனை முதல்-மந்திரி ஆக்குவதிலும், சோனியாகாந்திக்கு தனது மகனை பிரதமர் ஆக்குவதிலும்தான் அக்கறை உள்ளது.2005-ம் ஆண்டுக்கு முன்பு, பீகார் இருளில் இருந்தது. அதன்பிறகு தேசிய ஜனநாயக கூட்டணி ஆட்சியில் வெளிச்சத்துக்கு வந்து விட்டது. முன்னணி மாநிலங்களில் ஒன்றாக முன்னேறி உள்ளது. 20 ஆண்டுகளில் வளர்ச்சி ஏற்பட்டுள்ளது. மாநிலத்துக்கான ரெயில்வே நிதி ஒதுக்கீடு 9 மடங்கு அதிகரித்துள்ளது. 20 வந்தே பாரத் ரெயில்களும், 26 அம்ரித் பாரத் ரெயில்களும் விடப்பட்டுள்ளன.

இவ்வாறு அவர் பேசினார்.