மார்கழி மாத அஷ்டமி: ராமேசுவரம் கோவில் நடை திறப்பில் மாற்றம்

ராமேஸ்வரம்,

தமிழகம் முழுவதும் உள்ள அனைத்து கோவில்களிலும் மார்கழி மாத அஷ்டமி பிரதட்சணையை முன்னிட்டு சிறப்பு பூஜைகள் நடைபெறுவது வழக்கம். அதுபோல் ராமேசுவரம் கோவிலிலும் ஆண்டுதோறும் மார்கழி மாத அஷ்டமி பிரதட்சணை அன்று கோவிலில் இருந்து சாமி-அம்பாள் எழுந்தருளி நகரின் அனைத்து பகுதிகளுக்கும் சென்று பக்தர்களுக்கு படி அளக்கும் நிகழ்ச்சி நடக்கிறது.

இந்த நிலையில் மார்கழி மாத அஷ்டமி பிரதட்சணையை முன்னிட்டு ராமேசுவரம் கோவிலில் நாளை நடை திறப்பில் மாற்றம் செய்யப்பட்டுள்ளது. அதன்படி நாளை அதிகாலை 3 மணிக்கு நடை திறந்து 3.30 மணி முதல் 4 மணி வரை ஸ்படிகலிங்க பூஜை நடைபெறும். தொடர்ந்து கால பூஜைகள் நடைபெற்று காலை7 மணிக்கு சாமி-அம்பாள் பஞ்சமூர்த்திகளுடன் எழுந்தருளி வீதி உலா நடைபெறும்

தொடர்ந்து நகரின் முக்கிய பகுதிகளில் எழுந்தருளி வீதி உலா வரும் சாமி பின்னர் பகல் 12 மணிக்கு மீண்டும் கோவிலுக்கு செல்லும். இதனால் நாளை காலை 7 மணி முதல் பகல் 12 மணி வரை கோவில் நடை சாத்தப்பட்டிருக்கும் என்றும் அந்த நேரம் பக்தர்கள் தீர்த்தம் நீராடவோ, தரிசனம் செய்யவோ அனுமதிக்கப்பட மாட்டார்கள். இந்த தகவலை கோவில் இணை ஆணையர் சிவராம்குமார் தெரிவித்துள்ளார்.