சென்னை,

தெலுங்கில் வரலாற்று புதினத்தை தழுவி உருவாகி இருக்கும் ஆன்மிக திரைப்படம் 'கண்ணப்பா'. மிகவும் பிரபலமான மகாபாரதம் தொடரை இயக்கிய பாலிவுட் இயக்குனர் முகேஷ் குமார் சிங் இத்திரைப்படத்தை இயக்கி இருக்கிறார். வரலாற்று பின்னணியில் கடவுள் சிவனை வழிபடும் அவரது தீவிர பக்தன் கண்ணப்பரை பற்றிய கதையை தழுவி இப்படம் உருவாகி இருக்கிறது.

இத்திரைப்படத்தில் பிரபல தெலுங்கு நடிகர் விஷ்ணு மஞ்சு கண்ணப்பர் வேடத்தில் நடித்துள்ளார். மேலும், மோகன்லால், பிரபாஸ், காஜல் அகர்வால், அக்சய் குமார், பிரீத்தி முகுந்தன், மோகன்பாபு உள்ளிட்டோர் முக்கிய கதாபாத்திரங்களில் நடித்திருக்கின்றனர்.

'கண்ணப்பா' திரைப்படம் வரும் ஜூன் மாதம் 27ம் தேதி தமிழ் , தெலுங்கு, இந்தி, ஆங்கிலம் , கன்னடம் ஆகிய மொழிகளில் ஒரு பான் இந்தியா திரைப்படமாக வெளியாகவுள்ளது. இப்படத்தின் மேக்கிங் வீடியோ சமீபத்தில் வெளியானது.

இந்நிலையில் 'கண்ணப்பா' படத்தின் முக்கியமான கிராபிக்ஸ் காட்சிகள் அடங்கிய ஹார்ட் டிரைவ் காணாமல் போனதாக தகவல் வெளியாகியுள்ளது. மும்பையில் உள்ள ஹைவ் ஸ்டூடியோவில் இருந்து ஹார்ட் டிரைவை கொரியர் மூலமாக போர் பிரேம்ஸ் ஸ்டூடியோவிற்கு அனுப்பி வைத்துள்ளனர். அந்த கொரியரை பெற்ற சரிதா என்ற தயாரிப்பு நிறுவன ஊழியர் தலைமறைவானதாக கூறப்படுகின்றது. இதனால் படக்குழு ஐதரபாத் காவல் நிலையத்தில் புகாரளித்துள்ளனர். இது யாரோ வேண்டும் என்றே படத்தை அழிக்க வேண்டும் என்ற நோக்கத்துடன் செய்தது போல் இருக்கிறது என புகாரளித்துள்ளனர். இதுக்குறித்த அதிகாரபூர்வ தகவல் விரைவில் வெளியாகும் என எதிர்ப்பார்க்கப்படுகிறது. போலீசார் தீவிர விசாரணையில் ஈட்டுப்பட்டு வருகின்றனர்.