பொங்கலன்று வெளியாகும் 'ஜெயிலர் 2' டீசர்?

சென்னை,

கடந்த 2023-ம் ஆண்டு நெல்சன் இயக்கத்தில் ரஜினி நடிப்பில் வெளியான படம் 'ஜெயிலர்'. இந்த படத்தில் ரஜினியுடன் இணைந்து வசந்த் ரவி, ரம்யா கிருஷ்ணன், யோகி பாபு, விநாயகன் ஆகியோர் முக்கிய கதாபாத்திரங்களில் நடித்திருந்தனர். சன் பிக்சர்ஸ் நிறுவனம் தயாரித்த இந்த படத்திற்கு அனிருத் இசையமைத்திருந்தார். இப்படம் ரூ.600 கோடிக்கும் மேல் வசூல் செய்து சாதனை படைத்தது.

இந்த படத்தின் வெற்றியை தொடர்ந்து இரண்டாம் பாகத்தை இயக்கத் திட்டமிட்டுள்ளார் நெல்சன். தற்போது ரஜினிகாந்த் லோகேஷ் கனகராஜின் கூலி படத்தில் நடித்து வருவதால் இதன் படப்பிடிப்பு நிறைவடந்த உடன் ஜெயிலர் 2 படப்பிடிப்பை தொடங்குவார் என்ற தகவல் வெளியாகி இருந்தது.

ஜெயிலர் படத்தின் 2-ம் பாகம் உருவாகும் என ஏற்கனவே நெல்சன் தெரிவித்திருந்தார். இதற்கான வேலைகள் நடைபெற்று வருகின்றன. படத்தின் புரோமோ ஷூட் பணிகள் கடந்த மாதம் நடைப்பெற்றது.

இந்நிலையில். சன் பிக்சர்ஸ் தயாரிப்பு நிறுவனத்தின் அடுத்த படம் குறித்த அப்டேட் வரும் 14ம் தேதி மாலை 6 மணிக்கு டீசராக வெளியாகும் என அறிவிப்பு வெளியாகியுள்ளது. மேலும் சென்னை, கோவை, நெல்லை, பெங்களூரு, திருவனந்தபுரம், பாலக்காடு, மும்பை ஆகிய இடங்களில் உள்ள திரையரங்குகளிலும் இந்த அறிவிப்பு டீசர் திரையிடப்படுகிறது.

இது 'ஜெயிலர் 2' படத்தின் டீசராக இருக்கும் என எதிர்பார்க்கப்படுகிறது.