சென்னை கைலாசநாதர் கோவில் திருப்பணி - அமைச்சர் சேகர்பாபு ஆய்வு

தமிழக முதல்-அமைச்சர் மு.க. ஸ்டாலின் வழிகாட்டுதலின்படி, இந்து சமய அறநிலையத்துறை அமைச்சர் சேகர்பாபு இன்று சென்னை, மாதவரம், அருள்மி            கு மாரியம்மன் திருக்கோவிலை புதிய கருங்கல் கட்டுமான திருக்கோவிலாக கட்டுவது குறித்தும், வேணுகோபால் நகர், அருள்மிகு கைலாசநாதர் திருக்கோவிலில் ரூ.2.50 கோடி மதிப்பீட்டில் நடைபெற்று வரும் திருக்குள திருப்பணியினையும் நேரில் பார்வையிட்டு ஆய்வு மேற்கொண்டார்.

இதுபற்றி அவர் கூறும்போது, இத்திருக்கோவில் கருங்கல் கட்டுமானத்திற்கு ரூ.1.50 கோடி செலவாகும் என மதிப்பிடப்பட்டு, மாநில வல்லுனர் குழு மற்றும் தொல்லியல் குழு அனுமதி வழங்கப்பட்டுள்ளது. மாதவரம் சட்டமன்ற உறுப்பினர் ரூ.50 லட்சம் உபயதாரர் நிதியாக பெற்று தருவதாகவும், மீதமுள்ள தொகை இந்து சமய அறநிலையத்துறை சார்பில் வழங்கிட வேண்டும் என்று கோரிக்கை வைத்தார். எஞ்சியுள்ள ரூ.1 கோடி மதிப்பீட்டிலான திருப்பணிகள், துறையின் மூலம் செய்து கொடுக்கப்படும். இத்திருப்பணி 2026 ஜனவரி மாதத்திற்குள் முடிக்கப்பட்டு குடமுழுக்கு நடத்திட வேண்டும் என்று திட்டமிடப்பட்டுள்ளது என்றார்.

அதேபோல் மாதவரம் அருள்மிகு கற்பகாம்பாள் சமேத கைலாசநாதர் திருக்கோவில் திருக்குள திருப்பணி ரூ.2.50 கோடி மதிப்பீட்டில் நடைபெற்று வருகிறது. அப்பணிகளை இன்றைய தினம் ஆய்வு செய்கின்றபோது இப்பணிக்கு கூடுதல் நிதி தேவை என சட்டமன்ற உறுப்பினர் அவர்கள் தெரிவித்தார். அதனையும் ஏற்று கூடுதல் நிதியை வழங்கி வருகின்ற 2025 மே மாதத்திற்குள் நிறைவு செய்து பக்தர்கள் பயன்பாட்டிற்கு ஒப்படைக்கப்படும் என அவர் கூறியுள்ளார்.