எல்லாமே ஐந்து.. விருத்தகிரீஸ்வரர் கோவில் சிறப்புகள்

விருத்தாசலம் விருத்தகிரீஸ்வரர் கோவிலில் எந்த கோவில்களிலும் இல்லாத வகையில் பல்வேறு சிறப்புகள் உள்ளன. பிரகாரங்கள், கோபுரங்கள், கொடிமரங்கள், தீர்த்தங்கள், தேர்கள், விநாயகர்கள், பூஜை வகைகள் என பல்வேறு அம்சங்கள் ஐந்து என்ற எண்ணிக்கையில் அமைந்திருப்பது இக்கோவிலின் தனிச்சிறப்பு.

பிரகாரங்கள்: கோவில் பிரகாரம் 3, தேரோடும் வீதி மற்றும் பஞ்சவர்ணப் பிரகாரம் (மானசிக ஆன்மப் பிரகாரம்).

கோபுரங்கள்: 4 கோபுரங்கள் மற்றும் கண்டராதித்த கோபுரம்.

கொடிமரங்கள்: வெளிப் பிரகாரத்தில் நந்தி மண்டபக் கொடிமரம், வன்னியடிப் பிராகாரத்தில் பிரதான கொடிமரம், தெற்கு, மேற்கு மற்றும் வடக்குச் சுற்றுகளில் உள்ள 3 கொடிமரங்கள்.

தீர்த்தங்கள்: அக்னி, சக்கர, குபேர, மணிமுத்தா நதி மற்றும் நித்யானந்த கூபம் (இறைவனோடு இணையும் ஆனந்த ஆன்ம அனுபவம்)

விநாயகர்கள்: ஆழத்துப் பிள்ளையார், வல்லப விநாயகர், மாற்றுரைத்த விநாயகர், தசபுஜ விநாயகர், முப்பிள்ளையார்.

தேர்கள்: விநாயகர், பழைமலைநாதர், பெரிய நாயகி, சுப்ரமணியர் மற்றும் சண்டிகேஸ்வரர் தேர்கள்.

தேவர்கள் வழிபட்ட தலம்: திருமால், பிரம்மா, இந்திரன், குபேரன் மற்றும் குபேரனின் தங்கை.

ரிஷிகள் வழிபட்ட தலம்: சுக்கிரன், யாக்ஞ வல்கியர், அகத்தியர், அத்திரி மற்றும் காசியப்பர்.

மகான்கள் வழிபட்ட தலம்: விபச்சித்து, ரோமசர், நாதசர்மா, அநவர்த்தனி மற்றும் குமாரசர்மா.

முக்கிய மண்டபங்கள்: தீபாராதனை மண்டபம், நூற்றுக்கால் மண்டபம், விபச்சித்து மண்டபம், ஊஞ்சல் மண்டபம் மற்றும் இசை மண்டபம் (கோவில் முகப்பில் இருக்கும் மண்டபம், அம்மன் சந்நிதி முன் மண்டபம் ஆகியவற்றையெல்லாம் சேர்த்தால் இன்னும் அதிகமாகும்).

பூஜை வகைகள்: திருவனந்தல், காலசந்தி, உச்சிக்காலம், சாயரக்சை மற்றும் அர்த்தஜாமம்.

தலத்தின் 5 பெயர்கள்: திருமுதுகுன்றம், விருத்தகாசி, விருத்தாசலம், நெற்குப்பை, மதுகிரி.