நிலவில் ஆய்வை தொடங்கி விட்டேன் - ரோவர் தகவல்: அடுத்த 14 நாட்கள்... 'ரோவர்' செய்யப்போகும் மெகா சம்பவம்

நிலவில் வெற்றிக்கொடி நாட்டிய சந்திரயான்: கட்சித் தலைவர்கள் பாராட்டு

புதுடெல்லி,

‘சந்திரயான்-3’ விண்கலத்தின் ‘விக்ரம் லேண்டர்’ நிலவில் தரையிறங்கியதை நாடு முழுவதும் மக்கள் கொண்டாடி வருகிறார்கள். பல தரப்பில் இருந்தும் இஸ்ரோ விஞ்ஞானிகளுக்கு பாராட்டுகள் குவிகின்றன.

பா.ஜனதா

இந்த நிலையில் பா.ஜனதா தேசிய தலைவர் ஜே.பி.நட்டா கூறுகையில், ‘பிரதமர் நரேந்திர மோடியின் தளர்வில்லா முயற்சிகளாலும், நமது விஞ்ஞானிகளின் அளப்பரிய திறமையாலும்தான் இந்த வெற்றி சாத்தியமாகி இருக்கிறது. இது ஒரு வரலாற்றுச் சிறப்புமிக்க, இதுவரை நிகழ்த்தப்படாத சாதனை ஆகும்’ என்றார்.

காங்கிரஸ்

காங்கிரஸ் தலைவர் மல்லிகார்ஜுன கார்கே கூறும்போது, ‘சந்திரயான்-3’ விண்கலத்தின் ‘லேண்டர்’ நிலவில் தரையிறங்கியது, ஒவ்வொரு இந்தியரின் கூட்டு வெற்றி ஆகும்.

140 கோடி அபிலாஷைகளுடன் பெருமகிழ்ச்சி அடைந்திருக்கிற நாடு, நமது 60 ஆண்டுகால விண்வெளி திட்டத்தின் மற்றும் ஒரு சாதனையை இன்று கண்டிருக்கிறது.

இந்த விண்வெளிப் பயண திட்டத்தை வெற்றியாக்கிய நமது விஞ்ஞானிகள், விண்வெளி என்ஜினீயர்கள், ஆராய்ச்சியாளர்கள் மற்றும் இதில் தொடர்புடைய அனைவரின் அசாதாரண கடின உழைப்பு, இணையற்ற புத்திக்கூர்மை, மாறாத அர்ப்பணிப்புக்கு நாம் மிகவும் நன்றிக்கடன் பட்டுள்ளோம்.’

இவ்வாறு அவர் கூறினார்.

ஆம் ஆத்மி

டெல்லி முதல்-மந்திரியும், ஆம் ஆத்மி தேசிய ஒருங்கிணைப்பாளருமான அரவிந்த் கெஜ்ரிவால் வெளியிட்ட ‘எக்ஸ்’ பதிவில், ‘இது ஒரு வரலாறு. நம் நாட்டுக்கு மிகப்பெரிய சாதனை. நம் அனைவருக்கும் பெருமை அளிக்கும் விஷயம். நாட்டு மக்கள் அனைவருக்கும், விஞ்ஞானிகளுக்கும், என்ஜினீயர்களுக்கும், இஸ்ரோ ஊழியர்களுக்கும் வாழ்த்துகள். பாரத மாதாவுக்கு வணக்கம்’ என்று கூறியுள்ளார்.

திரிணாமுல் காங்கிரஸ்

மேற்கு வங்காள முதல்-மந்திரியும், திரிணாமுல் காங்கிரஸ் கட்சித் தலைவருமான மம்தா பானர்ஜி, ‘விண்வெளித்துறையில் வரலாற்று சாதனை புரிந்த இஸ்ரோ விஞ்ஞானிகளின் அபார வெற்றிக்கு வாழ்த்துகள்’ என்று தெரிவித்துள்ளார்.

சோவியத் ஒன்றியம், அமெரிக்கா, சீனாவுக்குப் பிறகு நிலவில் தடம் பதித்த 4-வது நாடானது இந்தியா

புதுடெல்லி,

‘சந்திரயான்-3’ன் மூலம், நிலவில் தடம் பதித்த 3 நாடுகள் பட்டியலில் இந்தியா இணைந்திருக்கிறது.

இந்தியாவுக்கு முன்பு நிலவு மண்ணை முத்தமிட்ட 3 நாடுகள், ரஷியாவை உள்ளடக்கிய முந்தைய சோவியத் ஒன்றியம், அமெரிக்கா, சீனா ஆகும்.

சோவியத் ஒன்றியம்

ஆனால் சோவியத் ஒன்றியமும், அமெரிக்காவும் கூட நிலவில் தங்கள் முதல் முயற்சியில் வெற்றிபெறவில்லை. சோவியத் ஒன்றியம் தனது 6-வது முயற்சியில்தான் நிலவுப் பரப்பை தொட்டது.

அதன் ‘லூனா-2’ விண்கலம், 1959-ம் ஆண்டு செப்டம்பர் 14-ந் தேதி நிலவில் மோதி நொறுங்கியது. ஆனால் பூமிக்கு வெளியே வேறு ஒரு கோளில் மோதிய, மனிதனால் உருவாக்கப்பட்ட முதல் பொருளாக அது ஆனது.

அமெரிக்கா

அதேபோல அமெரிக்க விண்வெளி ஆய்வு நிறுவனமான ‘நாசா’, 13 தோல்விகரமான முயற்சிகளுக்குப் பின், 1964 ஜூலை 31 அன்று நிலவில் வெற்றியை ருசித்தது.

சீனா

சோவியத் ஒன்றியம், அமெரிக்காவை தொடர்ந்து, நிலவை நோக்கிய தனது ‘சாங் இ’ திட்டத்தை சீனா தொடங்கியது. அதன் ‘சாங் இ-3’ விண்கலம், 2013-ம் ஆண்டு டிசம்பர் 14-ந் தேதி முதல்முறையாக நிலவு பரப்பைத் தொட்டது. அந்த வரிசையில் கடந்த 2020-ம் ஆண்டு நவம்பர் 23-ந் தேதி ஏவப்பட்ட ‘சாங் இ-5’ விண்கலம், அந்த ஆண்டு டிசம்பர் 1-ந் தேதி நிலவில் தரையிறங்கி, அதே மாதத்தின் 16-ந் தேதி 2 கிலோ நிலவு மண்ணை பூமிக்கு கொண்டு வந்தது.

இந்தியா

கடந்த 2008-ம் ஆண்டு அக்டோபர் 22-ந் தேதி ‘சந்திரயான்-1’ ஏவல் மூலம் தனது நிலவு ஆராய்ச்சி பயணத்தை தொடங்கிய இந்தியா, தற்போது ‘சந்திரயான்-3’ மூலம் வெற்றிகரமாக சந்திரனில் தடம் பதித்திருக்கிறது. ஆனால் சோவியத் ஒன்றியம், அமெரிக்கா மற்றும் சீனாவின் நிலவு முயற்சிகளுக்கு இல்லாத சிறப்பு, இதுவரை அறியப்படாத நிலவின் தென்துருவப் பகுதியில் ‘சந்திரயான்-3’ லேண்டர் தரையிறங்கி ஆராய்வதுதான்.

நிலவின் தரையை தொட்டது பிரக்யான் ரோவர்..!!

நிலவின் தென்துருவத்தை ஆய்வு செய்வதற்காக இஸ்ரோவால் அனுப்பப்பட்ட சந்திரயான்-3 விண்கலம் 41 நாட்கள் பயணம் செய்து இலக்கை அடைந்து விட்டது.

விண்கலத்தில் இணைக்கப்பட்டிருந்த விக்ரம் லேண்டர் நேற்று மாலை 6.04 மணிக்கு வெற்றிகரமாக நிலவில் தரையிறக்கப்பட்டது. மிகவும் சவாலான இந்த பணிகளை பெங்களூரு தரை கட்டுப்பாட்டுத்தளத்தில் இருந்து விஞ்ஞானிகள் மிகுந்த சாதூர்யமாக நடத்தி முடித்தனர்.

இஸ்ரோ விஞ்ஞானிகளின் இந்த அயராத பணிகள் உலக நாடுகளின் பாராட்டுகளை பெற்றுள்ளது.

விக்ரம் லேண்டர் தரையிறங்கியபின் இந்த திட்டத்தின் அடுத்த பணியான பிரக்யான் ரோவர் வெளியேற்றத்தை விஞ்ஞானிகள் மேற்கொண்டனர்.

அவர்களின் சீரிய முயற்சியால் லேண்டரின் வயிற்றுப்பகுதியில் இருந்த இந்த ரோவர் சில மணி நேரங்களில் வெளியேறியது. இது விஞ்ஞானிகளுக்கு இரட்டிப்பு மகிழ்ச்சியை கொடுத்து உள்ளது.

இரவு சுமார் 10 மணிக்கு விக்ரம் லேண்டரின் பக்கவாட்டில் இருந்த சாய்தள கதவு திறக்கப்பட்டது. மெல்ல மெல்ல ஒவ்வொரு அங்குலமாக ஊர்ந்து நிலவில் தனது முதல் அடியை பிரக்யான் ரோவர் எடுத்து வைத்தது.

தற்போது விக்ரம் லேண்டர் தரையிறங்கிய 6 மணி நேரத்திற்கு பின்பு பிரக்யான் ரோவர் நிலவின் தரையை தொட்டுள்ளது.

இதன்படி சந்திரயான் - 3யின் அடுத்தகட்டம் வெற்றிகரமாக நிறைவேற்றப்பட்டுள்ளது.

நிலவின் தரைப்பகுதியில் தடம் பதித்த ரோவர், அங்கேயே உருண்டோடி ஆய்வு பணிகளை தொடங்கி இருக்கிறது. தொடர்ந்து 14 நாட்கள் நிலவின் தரைப்பகுதியில் பல்வேறு ஆய்வுகளை ரோவர் மேற்கொள்ளும் என விஞ்ஞானிகள் தெரிவித்து உள்ளனர்.

சந்திரயான்-3 கடந்து வந்த பாதை

இந்த ஆண்டு ஜூலை 14:- ஸ்ரீஹரிகோட்டாவில் உள்ள ஏவுதளத்தில் இருந்து இலகுரக செலுத்து வாகனம் மூலமாக சந்திரயான்-3 செலுத்தப்பட்டது. சரியான சுற்றுவட்டப்பாதையில் சந்திரயான்-3 தனது பயணத்தை தொடங்கியது.

ஜூலை 15:- பெங்களூருவில் இருந்து சந்திரயான்-3 சுற்றுவட்டப்பாதையை முதல் முறையாக உயர்த்தும் நிகழ்வு வெற்றிகரமாக நடந்தது.

ஜூலை 17:-2-வது தடவையாக சுற்றுவட்டப்பாதையை உயர்த்தும் நிகழ்வு வெற்றிகரமாக நடந்தது.

ஜூலை 22- 3-வது தடவையாக சுற்றுவட்டப்பாதை உயர்த்தப்பட்டது.

ஜூலை 25:- 4-வது தடவையாக சுற்றுவட்டப்பாதை உயர்த்தப்பட்டது.

ஆகஸ்டு 1:- நிலவின் சுற்றுவட்டப்பாதையில் சந்திரயான்-3 ஐ ‘இஸ்ரோ’ வெற்றிகரமாக நுழைத்தது.

ஆகஸ்டு 5:- நிலவின் சுற்றுவட்டப்பாதை வெற்றிகரமாக குறைக்கப்பட்டது.

ஆகஸ்டு 6:- 2-வது தடவையாக நிலவின் சுற்றுவட்டப்பாதை குறைக்கப்பட்டது. சந்திரயான்-3 பார்வையில் எடுக்கப்பட்ட நிலவின் வீடிேயாவை ‘இஸ்ரோ’ வெளியிட்டது.

ஆகஸ்டு 7:- சந்திரயான்-3 சுற்றுவட்டப்பாதை குறைக்கப்பட்டது.

ஆகஸ்டு 14:- நிலவின் சுற்றுவட்டப்பாதையில் சந்திரயான்-3 சுற்றி வந்தது.

ஆகஸ்டு 17:- சந்திரயான் விண்கலத்தின் உந்துகலனில் இருந்து ‘லேண்டர்’ கருவி வெற்றிகரமாக பிரிக்கப்பட்டது.

ஆகஸ்டு 19:- லேண்டர் சாதனத்தின் சுற்றுவட்டப்பாதை குறைக்கப்பட்டது.

ஆகஸ்டு 20:- மீண்டும் லேண்டர் சாதனத்தின் சுற்றுவட்டப்பாதை குறைக்கப்பட்டது.

ஆகஸ்டு 21:- சந்திரயான்-2 வில் உள்ள ஆர்பிட்டர் கருவி, லேண்டர் சாதனத்தை வரவேற்றது. இரு சாதனங்களுக்கும் இடையே இருவழி தகவல் தொடர்பு உருவானது.

ஆகஸ்டு 22:- லேண்டர் சாதனம் எடுத்த நிலவின் புகைப்படம் வெளியிடப்பட்டது.

நிலவில் தரையிறங்கிய விக்ரம் லேண்டரில் இருந்து வெற்றிகரமாக வெளியேறியது பிரக்யான் ரோவர்..!!

பெங்களூரு,

நிலவில் தரையிறங்கிய சந்திரயான்-3 விண்கலத்தின் லேண்டரில் இருந்து ரோவர் வெளியேறியது. இது 14 நாட்கள் நிலவின் மேற்பரப்பில் ஆய்வு நடத்துகிறது.

வெற்றிகரமாக தரையிறங்கியது

நிலவின் தென்துருவத்தை ஆய்வு செய்வதற்காக இஸ்ரோவால் அனுப்பப்பட்ட சந்திரயான்-3 விண்கலம் 41 நாட்கள் பயணம் செய்து இலக்கை அடைந்து விட்டது.

விண்கலத்தில் இணைக்கப்பட்டிருந்த விக்ரம் லேண்டர் நேற்று மாலை 6.04 மணிக்கு வெற்றிகரமாக நிலவில் தரையிறக்கப்பட்டது. மிகவும் சவாலான இந்த பணிகளை பெங்களூரு தரை கட்டுப்பாட்டுத்தளத்தில் இருந்து விஞ்ஞானிகள் மிகுந்த சாதூர்யமாக நடத்தி முடித்தனர்.

இஸ்ரோ விஞ்ஞானிகளின் இந்த அயராத பணிகள் உலக நாடுகளின் பாராட்டுகளை பெற்றுள்ளது.

ரோவர் வெளியேறியது

விக்ரம் லேண்டர் தரையிறங்கியபின் இந்த திட்டத்தின் அடுத்த பணியான பிரக்யான் ரோவர் வெளியேற்றத்தை விஞ்ஞானிகள் மேற்கொண்டனர்.

அவர்களின் சீரிய முயற்சியால் லேண்டரின் வயிற்றுப்பகுதியில் இருந்த இந்த ரோவர் சில மணி நேரங்களில் வெளியேறியது. இது விஞ்ஞானிகளுக்கு இரட்டிப்பு மகிழ்ச்சியை கொடுத்து உள்ளது.

நிலவின் தரைப்பகுதியில் தடம் பதித்த ரோவர், அங்கேயே உருண்டோடி ஆய்வு பணிகளை தொடங்கி இருக்கிறது. தொடர்ந்து 14 நாட்கள் நிலவின் தரைப்பகுதியில் பல்வேறு ஆய்வுகளை ரோவர் மேற்கொள்ளும் என விஞ்ஞானிகள் தெரிவித்து உள்ளனர்.

புகைப்படம் அனுப்பியது

முன்னதாக, விக்ரம் லேண்டர் நிலவில் தரையிறங்கியதும் புகைப்படங்களை எடுத்து அனுப்பத்தொடங்கியது. இதில் லேண்டர் தரையிறங்கி இருக்கும் பகுதிகளும் தெளிவாக தெரிவதாக விஞ்ஞானிகள் தெரிவித்தனர்.

இந்த புகைப்படத்தில் லேண்டரின் ஒரு கால் பகுதியும், அதன் நிழலும் தெளிவாக தெரிவதாக கூறிய விஞ்ஞானிகள், நிலவின் ஒரு தட்டையான பகுதியில் லேண்டர் தரையிறங்கியிருப்பது புகைப்படம் மூலம் அறிய முடிவதாகவும் தெரிவித்தனர்.

விக்ரம் லேண்டரில் இருந்து பிரக்யான் ரோவரை தரையிறக்கும் பணி தொடக்கம்

பெங்களூரு,

நிலவின் தென் துருவ பகுதியை ஆய்வு செய்வதற்காக அனுப்பப்பட்ட சந்திரயான்-3 விண்கலத்தின் விக்ரம் லேண்டர், இன்று மாலை 6.04 மணிக்கு நிலவில் தரையிறங்கி வெற்றியடைந்து சாதனை படைத்தது. இந்த வெற்றியால், அமெரிக்கா, ரஷியா மற்றும் சீனாவை தொடர்ந்து நிலவு பற்றிய ஆய்வில் சாதனை படைத்த 4-வது நாடாக இந்தியா உருவெடுத்துள்ளது.

இந்த சூழலில், நிலவில் லேண்டர் பாதுகாப்பான இடம் தேடி, தேர்வு செய்து இறங்கிய விவரங்களை இஸ்ரோ வெளியிட்டது. இதன்படி, சந்திரயான்-3 விண்கலத்தின் லேண்டர் நிலவில் தரையிறங்கும் முன்பு 150 மீட்டர் உயரத்தில் இருந்தபோது, அதற்கு நேர் செங்குத்து பகுதியில் பள்ளம் இருந்தது கண்டறியப்பட்டது.

இடர்பாடுகளை உணர்ந்து ஆபத்துகளை தவிர்ப்பதற்காக இணைக்கப்பட்ட கேமரா உடனடியாக செயல்பட்டு, படம் எடுத்து எச்சரிக்கை செய்தது. இது, லேண்டர் பாதுகாப்பாக தரையிறங்க உதவியதாக இஸ்ரோ தெரிவித்தது. ஆபத்து தவிர்ப்பு கேமராவில் பதிவான புகைப்படம் மற்றும் லேண்டர் பாதுகாப்பாக சற்று தள்ளி இறங்கிய படமும் வெளியிடப்பட்டது.

இதேபோன்று, நிலவில் இறங்கிய விக்ரம் லேண்டர், அதற்கு சிறிது நேரத்திற்கு முன் எடுத்த புகைப்படங்களையும் இஸ்ரோ வெளியிட்டது. லேண்டர் தரையிறங்கிய பின்னர், லேண்டிங் இமேஜர் கேமரா எடுத்த புகைப்படமும் வெளிவந்து உள்ளது. அதில், சந்திரயான்-3 விண்கலம் தரையிறங்கிய ஒரு பகுதி உள்ளது. லேண்டரின் ஒரு கால் பகுதியின் நிழலும் காணப்படுகிறது. நிலவில் சமதள பகுதியை தேர்வு செய்து சந்திரயான்-3 விண்கலத்தின் லேண்டர் தரையிறங்கியது.

இந்நிலையில் நிலவில் தரையிறங்கிய லேண்டரில் இருந்து ரோவரை தரையிறக்கும் பணி தொடங்கி உள்ளதாக இஸ்ரோ தெரிவித்துள்ளது. நிலவில் தரையிறங்கும் ரோவர் 14 நாட்கள் தொடர்ந்து ஆய்வு மேற்கொள்ள உள்ளது. லேண்டரில் இருந்து மெல்ல தரையிறங்கும் பிரக்யா, முதலில் தன்னை சுமந்த விக்ரமை படமெடுக்க உள்ளது.

முன்னதாக லேண்டர் தரையிறங்கியபோது, நிலவில் புழுதி படலம் ஏற்பட்டது. அது அடங்கிய பின்னர், லேண்டரில் இருந்து ரோவர் வெளிவந்து ஆய்வு பணியில் ஈடுபட உள்ளது குறிப்பிடத்தக்கது.

நான் எனது இலக்கை அடைந்துவிட்டேன், நீங்களும் கூட... விக்ரம் லேண்டர் அனுப்பிய முதல் தகவல்

சந்திரயான்-3 விண்கலம் கடந்த மாதம் 14-ந் தேதி விண்ணில் ஏவப்பட்டது முதல் நேற்று மாலை விக்ரம் லேண்டர் நிலவில் தரையிறங்கியது வரை நிலவு பயணத்தின் ஒவ்வொரு நிகழ்வையும் இஸ்ரோ ‘எக்ஸ்’ (டுவிட்டர்) உள்ளிட்ட சமூக வலைத்தளங்களில் பதிவிட்டது. இந்த பதிவுகள் அனைத்தும் இணைய ஆர்வலர்கள் மத்தியில் பெரும் வரவேற்பை பெற்றன. குறிப்பாக இஸ்ரோ பயன்படுத்திய சொற்கள் பல கோடி இணைய ஆர்வலர்களின் இதயங்களை வென்றன.

கடந்த திங்கட்கிழமை சந்திரயான்-3 விண்கலத்தின் விக்ரம் லேண்டரை அதன் முன்னோடியான சந்திரயான்-2 விண்கலத்தின் ஆர்பிட்டர் முறைப்படி வரவேற்றதை விளக்கும் விதமாக இஸ்ரோ டுவிட்டரில் “வரவேற்கிறேன் நண்பா. இருவருக்கும் இடையே இருவழி தொடர்பு ஏற்படுத்தப்பட்டது” என வெளியிட்ட பதிவு குறுகிய நேரத்திலேயே 30 லட்சத்துக்கும் மேலான பார்வையாளர்களை ஈர்த்தது.

அதேபோல் கடந்த 17-ந் தேதி சந்திரயான்-3 விண்கலத்தில் இருந்து விக்ரம் லேண்டர் தனியாக பிரிந்து நிலவை நோக்கிய தனது பயணத்தை தொடங்கியதை குறிப்பிட்டு, “சவாரிக்கு நன்றி, நண்பா” என விக்ரம் லேண்டர் சந்திரயான்-3 விண்கலத்திடம் கூறுவதுபோல இஸ்ரோ டுவிட்டரில் பதிவு ஒன்றை வெளியிட்டது. இந்த பதிவு சில நிமிடங்களிலேயே 50 லட்சத்துக்கும் அதிகமான பார்வையாளர்களை ஈர்த்தது.

இந்த நிலையில் நேற்று மாலை விக்ரம் லேண்டர் நிலவில் தரையிறங்கியதும் இஸ்ரோவுக்கு முதல் தகவலை அனுப்பியது. அது குறித்தும் இஸ்ரோ டுவிட்டரில் பதிவு ஒன்றை வெளியிட்டது.

அந்த பதிவில், “சந்திரயான்-3 திட்டம்: இந்தியா, நான் எனது இலக்கை அடைந்துவிட்டேன், நீங்களும் கூட” என விக்ரம் லேண்டர் அனுப்பிய முதல் தகவலை இஸ்ரோ குறிப்பிட்டிருந்தது.

பெங்களூரு,

பூமியின் துணைக்கோளான நிலவில் மனிதன் காலடி வைத்திருந்தாலும், அதிலுள்ள மர்மங்களை மனிதன் முழுவதுமாக இன்னும் அறிந்திடவில்லை.

நிலவு ஆய்வில் இந்தியா

அதை முற்றிலும் கண்டறிவதில்தான் ஒட்டுமொத்த உலக வல்லரசுகளும் ஈடுபட்டு இருக்கின்றன. மற்ற நாடுகளும் இந்த கனவை தக்க வைத்திருக்கின்றன.

நிலவில் தண்ணீர் உள்ளதா? பிராண வாயு இருக்கிறதா? உயிர்கள் வசிக்கின்றனவா? வாழ்வதற்கான சாத்தியம் உள்ளதா? என அது சார்ந்த தேடல்கள் தொடர்கின்றன.

சந்திரனை ஆய்வு செய்யும் இந்த போட்டியில் வல்லரசு நாடுகளுடன், ‘நாங்களும் இருக்கிறோம்’ என இந்தியாவும் அடிக்கடி உலகுக்கு அழுத்தமாக பறைசாற்றி வருகிறது.

சந்திரயான் திட்டம்

140 கோடி இந்தியர்களின் சார்பில், இஸ்ரோ எனப்படும் ‘இந்திய விண்வெளி ஆய்வு நிறுவனம்’ இந்த சாதனைகளை நிகழ்த்தி வருகிறது.

இந்தியாவின் இந்த தேடலுக்கு அச்சாரமிட்டது, சந்திரயான்-1.

கடந்த 2008-ம் ஆண்டு அக்டோபர் 22-ந்தேதி பி.எஸ்.எல்.வி. சி-11 ராக்கெட் மூலம் விண்ணில் செலுத்தப்பட்ட இந்த விண்கலம், முதன்முதலாக நிலவின் சுற்றுப்பாதையில் நுழைந்தது.

நிலவை சுற்றி வந்து ஆய்வு செய்த இந்த விண்கலம், நிலவில் தண்ணீர் இருப்பதற்கான ஆதாரங்களை முதன் முதலாக உலகுக்கு அறிவித்தது.

செயலிழந்த லேண்டர்

இதைத்தொடர்ந்து நிலவில் தரையிறங்கி அதுவும் உலகில் எந்த நாடுமே செல்லாத தென்துருவத்தில் தரையிறங்கி ஆய்வு செய்யும் வகையில் சந்திரயான்-2 விண்கலம் கடந்த 2019-ம் ஆண்டு ஜூலை மாதம் அனுப்பப்பட்டது.

ரூ.978 கோடி மதிப்பில் உருவாக்கப்பட்ட இந்த விண்கலத்தில், நிலவை சுற்றி வருவதற்காக ஆர்பிட்டர், தரையிறங்குவதற்கான லேண்டர், ஆய்வு செய்வதற்கான ரோவர் போன்றவை இணைக்கப்பட்டு இருந்தன.

ஆனால் துரதிர்ஷ்டவசமாக சந்திரயான்-2 விண்கலத்தில் இருந்த விக்ரம் லேண்டர், தரையிறங்கும்போது தொழில்நுட்பக் கோளாறு காரணமாக நிலவின் தரைப்பகுதியில் மோதி செயலிழந்தது.

ஆனாலும், அதன் ஆர்பிட்டர் நிலவின் சுற்றுப்பாதையில் தற்போதும் வெற்றிகரமாக வலம் வந்து கொண்டிருக்கிறது. செயல்பாட்டிலும் உள்ளது.

சந்திரயான்-3 விண்கலம்

சந்திரயான்-2 திட்டத்தில் ஏற்பட்ட லேசான சறுக்கலால் துவண்டு விடாத இஸ்ரோ, அதில் இருந்து பெற்றுக்கொண்ட பாடங்களை வைத்துக்கொண்டு மீண்டும் சந்திரனை ஆய்வு செய்ய திட்டத்தை உருவாக்கியது.

இதற்காக உருவாக்கப்பட்ட திட்டமே, சந்திரயான்-3 விண்கலம்.

ரூ.615 கோடி மதிப்பில் உருவாக்கப்பட்ட இந்த திட்டத்தில் சந்திரயான்-3 விண்கலத்துடன் நிலவின் மேற்பரப்பில் தரையிறங்கி ஆய்வு செய்வதற்காக லேண்டர் மற்றும் ரோவரும் இணைக்கப்பட்டு இருந்தன.

இந்த விண்கலம் எல்.வி.எம்.3-எம்.4 ராக்கெட் மூலம் கடந்த மாதம் 14-ந்தேதி ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் இருந்து விண்ணில் ஏவப்பட்டது.

5 கட்ட பணிகள்

ஒட்டுமொத்த உலகின் பார்வையை ஈர்த்துக்கொண்டு, 140 கோடி இந்தியர்களின் கனவுகளை சுமந்தவாறு சென்ற இந்த ராக்கெட் 179 கி.மீ. உயரத்தை அடைந்ததும் சந்திரயான்-3 விண்கலத்தை புவியின் சுற்று வட்டப்பாதையில் செலுத்தியது.

அதன்பின்னர் சந்திரயான்-3 விண்கலத்தை நிலவை நோக்கி செலுத்தும் பணிகளை பெங்களூருவில் உள்ள தரை கட்டுப்பாட்டுத்தளத்தில் இருந்து விஞ்ஞானிகள் மேற்கொண்டனர்.

சந்திரயான்-3 விண்கலத்தின் பயணமானது, பூமியில் இருந்து விண்ணை நோக்கி செல்வது, பூமியை சுற்றுவது, பூமியில் இருந்து நிலவை நோக்கிய பயணம், நிலவை சுற்றுவது, நிலவில் தரையிறங்குவது என்று 5 கட்டங்களாக பிரிக்கப்பட்டு இருந்தது.

இதன் இறுதி நிலையான நிலவின் தென்துருவத்தில் தரையிறங்கும் வரலாற்று நிகழ்வு ஆகஸ்டு 23-ந்தேதி (நேற்று) நடைபெறும் என விஞ்ஞானிகள் அறிவித்து இருந்தனர். அதற்காக இரவு-பகல் பாராமல் சந்திரயானோடு விஞ்ஞானிகளின் ஆய்வு மற்றும் கண்காணிப்பு பயணமும் நீடித்தது.

படிப்படியாக உயர்த்தினர்

அதன்படி, புவி வட்டப்பாதையில் நிலை நிறுத்தப்பட்ட சந்திரயான்-3 விண்கலத்தின் உயரத்தை முதலில் விஞ்ஞானிகள் படிப்படியாக உயர்த்தி கொண்டே வந்தனர். பின்னர் நிலவு சுற்றுவட்டப்பாதையை நோக்கி கடந்த 1-ந்தேதி செலுத்தப்பட்டது.

இவ்வாறு நிலவு சுற்றுவட்டப்பாதையில் சுற்றி வந்த விண்கலத்தின் உயரம் படிப்படியாக குறைக்கப்பட்டு வந்தது. ஒரு கட்டத்தில், சந்திரயான் விண்கலத்தின் உந்துகலனில் இருந்து ‘லேண்டர்’ கருவி வெற்றிகரமாக பிரிக்கப்பட்டது. இது கடந்த 17-ந்தேதி நடந்தது.

இதைத்தொடர்ந்து லேண்டர் கருவி சுற்றுவட்டப்பாதையின் உயரத்தை விஞ்ஞானிகள் படிப்படியாக குறைத்துக்கொண்டே வந்தனர். சவால் நிறைந்த இந்த பணிகளை பெங்களூருவில் உள்ள தரை கட்டுப்பாட்டு மையத்தில் இருந்து விண்கலத்துக்கு சிக்னல்களை அளித்தவாறே விஞ்ஞானிகள் மேற்கொண்டனர்.

நம்பிக்கையுடன் தரையிறக்கினர்

இறுதியாக நிலவின் மேற்பரப்பில் லேண்டரை தரையிறக்கும் அந்த நாளும் (நேற்று) வந்தது. இதற்காக 140 கோடி இந்தியர்கள் மட்டுமின்றி ஒட்டுமொத்த உலகின் கவனமும் சந்திரயான்-3 விண்கலத்தை நோக்கியே இருந்தன.

இந்த கனவுக்கு உயிர்கொடுக்கும் பணிகளை இஸ்ரோ விஞ்ஞானிகள் நேற்று மாலை 5.44 மணிக்கு தொடங்கினர்.

ரோவருடன் மொத்தம் 1,749.84 கிலோ எடை கொண்ட லேண்டரை தரையிறக்குவதில் பெரும் சவால்கள் இருந்தபோதும், இந்த பணிகளில் மிகுந்த நம்பிக்கையுடனும், உற்சாகத்துடனும் அவர்கள் ஈடுபட்டனர்.

நிலவின் மேற்பரப்பில் இருந்து 25 கி.மீ. உயரத்தில் லேண்டர் சுற்றிக்கொண்டு இருந்தபோது தானியங்கி தரையிறங்கும் செயல்பாட்டை விஞ்ஞானிகள் தொடங்கினர். அதன்படி லேண்டரின் தரையிறங்கும் வேகம் வினாடிக்கு 1.6 கி.மீ. ஆக குறைக்கப்பட்டது.

வரலாறு படைப்பு

அதைத்தொடர்ந்து நிலவின் ஈர்ப்பு சக்திக்கு ஏற்ப லேண்டரின் வேகத்தை குறைத்துக்கொண்டே வந்த விஞ்ஞானிகள் நிலவின் மேற்பரப்புக்கு இணையான (கிடைமட்ட) நிலையிலேயே அதை இயக்கினர்.

பின்னர் அதை தரையிறக்குவதற்கான பகுதியை அடைந்ததும் லேண்டரை செங்குத்தாக தரையிறக்குவதற்கான சிக்னல்களை விஞ்ஞானிகள் வழங்கினர்.

அதன்படி மாலை 6.04 மணியளவில் நிலவின் மேற்பரப்பில் லேண்டர் வெற்றிகரமாக தரையிறங்கியது.

நிலவு ஆய்வில் இந்தியா வரலாறு படைத்த தருணமாக அது மாறியது.

விஞ்ஞானிகள் ஆனந்த கண்ணீர்

அத்துடன் நிலவில் லேண்டரை தரையிறக்கிய நாடுகளில் அமெரிக்கா, சோவியத் ரஷியா மற்றும் சீனாவுக்கு அடுத்ததாக 4-வது நாடு என்ற பெருமையை இந்தியா பெற்றது.

அதேநேரம் நிலவின் தென்துருவத்தில் தரையிறங்கிய முதல் நாடு என்ற பெருமையும் இந்தியா வசமானது.

எந்தவித சிரமமும் இன்றி நிலவில் லேண்டர் தரையிறங்கிய அந்த கணம் பெங்களூருவில் உள்ள தரை கட்டுப்பாட்டு நிலையம் விஞ்ஞானிகள் மற்றும் பார்வையாளர்களின் கரவொலியால் அதிர்ந்தது. அது அடங்க சில நிமிடங்கள் ஆனது.

ஒருவருக்கொருவர் ஆரத்தழுவல், ஆனந்த கண்ணீர் என எங்கு நோக்கினும் ஆனந்தக் கொண்டாட்டங்கள்.

நிலவில் தரையிறங்கிய லேண்டருடன் பெங்களூரு தரை கட்டுப்பாட்டுத்தளத்துடன் தொடர்பு உருவாக்கப்பட்டு உள்ளது. இது விஞ்ஞானிகளுக்கு மேலும் மகிழ்ச்சியை கொடுத்து உள்ளது.

பிரதமர் மோடி பாராட்டு

இஸ்ரோ விஞ்ஞானிகளின் இந்த மகிழ்ச்சியில் பிரதமர் மோடியும் இணைந்தார்.

தென்ஆப்பிரிக்காவில் இருந்தவாறே காணொலி காட்சி மூலம் லேண்டர் தரையிறக்கத்தை கண்டுகளித்த பிரதமர் மோடி, நிகழ்வு வெற்றிகரமாக முடிந்ததை பார்த்து கைதட்டியும், தேசியக்கொடியை அசைத்தும் மகிழ்ச்சியை வெளிப்படுத்தினார்.

அத்துடன் விஞ்ஞானிகளை பாராட்டியும், நாட்டு மக்களுக்கு வாழ்த்து தெரிவித்தும் அவர் உரையாற்றினார்.

பட்டாசு வெடித்து கொண்டாட்டம்

42 நாட்களாக 3.84 லட்சம் கி.மீ. தொலைவை வெற்றிகரமாக கடந்துள்ள சந்திரயான்-3 விண்கலத்தின் லேண்டர் மற்றும் ரோவர் கருவிகள் வெற்றிகரமாக நிலவின் மேற்பரப்பை முத்தமிட்டது நாடு முழுவதும் மகிழ்ச்சி வெள்ளத்தை கரைபுரண்டோடச் செய்துள்ளது.

மக்கள் பட்டாசுகளை வெடித்தும், ஒருவருக்கு ஒருவர் இனிப்பு வழங்கியும் மகிழ்ச்சியை பகிர்ந்து கொண்டனர்.

நிலவு ஆய்வில் சரித்திர சாதனை படைத்ததற்கு அரசியல் கட்சியினர், திரைப்பிரபலங்கள், விளையாட்டு வீரர்கள் என அனைத்து தரப்பினரும் வாழ்த்து தெரிவித்தனர்.