ஜகர்த்தா,

இந்தோனேசிய ஓபன் பேட்மிண்டன் போட்டி தலைநகர் ஜகர்த்தாவில் நடந்து வருகிறது. இதில் நேற்று நடந்த ஆண்கள் ஒற்றையர் முதலாவது சுற்று ஆட்டம் ஒன்றில் முன்னாள் நம்பர் ஒன் வீரரான இந்தியாவின் ஸ்ரீகாந்த் 21-13, 21-19 என்ற நேர்செட்டில் சீனாவின் லூ குயாங் சூவை வீழ்த்தி 2-வது சுற்றுக்கு முன்னேறினார்.

மற்றொரு ஆட்டத்தில் காமன்வெல்த் சாம்பியனான இந்திய வீரர் லக்ஷயா சென் 21-17, 21-13 என்ற நேர்செட்டில் உலக தரவரிசையில் 11-வது இடத்தில் உள்ள லீ ஜி ஜியாவை (மலேசியா) விரட்டியடித்து 2-வது சுற்றுக்குள் நுழைந்தார். அடுத்த சுற்று ஆட்டத்தில் ஸ்ரீகாந்த்-லக்ஷயா சென் மோதுகிறார்கள். இன்னொரு ஆட்டத்தில் இந்திய வீரர் பிரியான்ஷூ ரஜாவத்தை எதிர்த்து ஆட வேண்டிய குன்லாவுத் விதித்சரண் (தாய்லாந்து) கடைசி நேரத்தில் விலகியதால் போட்டியின்றி பிரியான்ஷூ ரஜாவத் 2-வது சுற்றை எட்டினார்.

பெண்கள் ஒற்றையர் பிரிவில் இந்தியாவின் ஆகார்ஷி காஷ்யப் 10-21, 4-21 என்ற நேர்செட்டில் தென்கொரியாவின் அன் சி யோங்கிடம் தோற்று வெளியேறினார்.