சர்வதேச குத்துச்சண்டை போட்டி: இந்திய வீரர் கவுரவ் அரைஇறுதிக்கு தகுதி

அஸ்தானா,

எலோர்டா கோப்பை சர்வதேச குத்துச்சண்டை போட்டி கஜகஸ்தான் தலைநகர் அஸ்தானாவில் நடந்து வருகிறது. இதில் நேற்று நடந்த ஆண்களுக்கான 92 கிலோவுக்கு அதிகமான எடைப்பிரிவில் இந்திய வீரர் கவுரவ் சவுகான் 3-2 என்ற கணக்கில் கஜகஸ்தான் வீரர் டேனியல் சபர்பாயை வீழ்த்தி அரைஇறுதிக்கு முன்னேறினார்.

63.5 கிலோ எடைப்பிரிவின் முதல் சுற்றில், ஆசிய சாம்பியன்ஷிப்பில் 6 முறை பதக்கம் வென்ற இந்திய வீரர் ஷிவ தபா 1-4 என்ற கணக்கில் கஜகஸ்தானின் அப்துலி அல்மாத்விடம் வீழ்ந்து நடையை கட்டினார். இதேபோல் 80 கிலோ எடைப்பிரிவில் இந்திய வீரர் சஞ்சய் 0-5 என்ற கணக்கில் ஆசிய விளையாட்டு சாம்பியனான தோஹிதாபி தாங்லாதிஹனிடம் (சீனா) தோற்று வெளியேறினார்.

முந்தைய நாளில் நடந்த பெண்களுக்கான 52 கிலோ எடைப்பிரிவின் முதல் சுற்றில் நடப்பு உலக சாம்பியனான இந்திய வீராங்கனை நிகாத் ஜரீன் 5-0 என்ற கணக்கில் கஜகஸ்தான் வீராங்கனை ராக்யம்பெர்டி ஜான்சயாவை விரட்டியடித்தார்.