ஆல்இங்கிலாந்து பேட்மிண்டன்: முதல் சுற்றில் பிரனாய், லக்ஷயா வெற்றி

பர்மிங்காம்,

பேட்மிண்டனில் மிகவும் கவுரவமிக்க போட்டிகளில் ஒன்றாக கருதப்படும் ஆல்இங்கிலாந்து பேட்மிண்டன் சாம்பியன்ஷிப் பர்மிங்காம் நகரில் நேற்று தொடங்கியது. உலகின் முன்னணி வீரர், வீராங்கனைகள் பங்கேற்றுள்ள இந்தபோட்டிக்கான மொத்த பரிசுத்தொகை ரூ.10¼ கோடியாகும்.

இதில் ஆண்கள் ஒற்றையர் முதலாவது சுற்று ஆட்டம் ஒன்றில் உலகத்தரவரிசையில் 9-வது இடத்தில் உள்ள இந்தியாவின் எச்.எஸ்.பிரனாய் 21-19, 22-20 என்ற நேர் செட்டில் சீனத்தைபேயின் சூ வெய் வாங்கை தோற்கடித்து 2-வது சுற்றுக்கு முன்னேறினார்.

மற்றொரு ஆட்டத்தில் இந்திய இளம் வீரர் லக்ஷயா சென் 21-18, 21-19 என்ற நேர் செட்டில் சீனத்தைபேயின் சோவ் டைன் சென்னை தோற்கடித்தார்.

பெண்கள் ஒற்றையர் பிரிவில் இந்திய நட்சத்திர வீராங்கனை பி.வி.சிந்து முதல் சவாலை சீனாவின் ஜாங் யி மானுடன் தொடங்குகிறார்.