2024 டி20 உலகக்கோப்பை; போட்டி அட்டவணை வெளியீடு...ஜூன் 9ல் இந்தியா - பாகிஸ்தான் ஆட்டம்...!

துபாய்,

2024 டி20 உலகக்கோப்பை கிரிக்கெட் தொடர் வெஸ்ட் இண்டீஸ் மற்றும் அமெரிக்காவில் ஜூன் மாதம் நடைபெற உள்ளது. இந்த தொடரில் மொத்தம் 20 அணிகள் கலந்து கொள்ள உள்ளன.

அதன்படி அமெரிக்கா, வெஸ்ட் இண்டீஸ், ஆஸ்திரேலியா, இங்கிலாந்து, இந்தியா, நெதர்லாந்து, நியூசிலாந்து, பாகிஸ்தான், தென் ஆப்பிரிக்கா, இலங்கை, ஆப்கானிஸ்தான், வங்காளதேசம், அயர்லாந்து, ஸ்காட்லாந்து, பப்புவா நியூ கினியா, கனடா, நேபாளம், ஓமன், நமீபியா மற்றும் உகாண்டா ஆகிய அணிகள் கலந்து கொள்கின்றன.

இந்த நிலையில், 2024 உலகக்கோப்பை தொடரின் போட்டி அட்டவணை தற்போது வெளியிடப்பட்டுள்ளது. தொடரில் கலந்து கொள்ளும் 20 அணிகள் 4 பிரிவுகளாக பிரிக்கப்பட்டுள்ளன.

அதன்படி பிரிவு ஏ-ல் இந்தியா, பாகிஸ்தான், அயர்லாந்து, கனடா, அமெரிக்கா அணிகளும், பிரிவு பி-ல் இங்கிலாந்து, ஆஸ்திரேலியா, நமீபியா, ஸ்காட்லாந்து, ஓமன் அணிகளும், பிரிவு சி-ல் நியூசிலாந்து, வெஸ்ட் இண்டீஸ், ஆப்கானிஸ்தான், உகாண்டா, பாபுவா நியூ கினியா அணிகளும், பிரிவு டி-ல் தென் ஆப்பிரிக்கா, இலங்கை, வங்காளதேசம், நெதர்லாந்து, நேபாளம் அணிகளும் இடம் பெற்றுள்ளன

ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் சுற்றின் முடிவில் ஒவ்வொரு பிரிவிலும் முதல் இரு இடங்களை பிடிக்கும் அணிகள் சூப்பர் 8 சுற்றுக்கு முன்னேறும். இதிலிருந்து 4 அணிகள் அரையிறுதிக்கு முன்னேறும். லீக் சுற்று ஆட்டங்கள் ஜூன் 1-ம் தேதி தொடங்குகிறது. முதலாவது ஆட்டத்தில் அமெரிக்கா மற்றும் கனடா அணிகள் மோத உள்ளன.

அதன்படி இந்திய அணி தனது முதல் ஆட்டத்தில் ஜூன் 5ம் தேதி அயர்லாந்து அணியை எதிர்கொள்கிறது. இதனை தொடர்ந்து, கிரிக்கெட் ரசிகர்கள் எதிர்பார்க்கும் இந்தியா - பாகிஸ்தான் இடையிலான போட்டி ஜூன் 9ஆம் தேதி நடைபெற உள்ளது.

குரூப் சுற்றில் இந்திய அணியின் போட்டி அட்டவணை :

*ஜூன் 5 - இந்தியா - அயர்லாந்து.

*ஜூன் 9 - இந்தியா - பாகிஸ்தான்.

*ஜூன் 12 - இந்தியா- அமெரிக்கா.

*ஜூன் 15 - இந்தியா - கனடா.

2024 டி20 உலககோப்பை தொடரின் அரையிறுதி ஆட்டங்கள் ஜூன் 26 மற்றும் 27ம் தேதிகளிலும், இறுதிப் போட்டி ஜூன் 29 ஆம் தேதி நடைபெற உள்ளதாக தெரிவிக்கப்பட்டுள்ளது.