விபீஷணர் பட்டாபிஷேக நிகழ்ச்சி: ராமேசுவரம் கோவிலில் நாளை தரிசன அனுமதி இல்லை

ராமேசுவரம்,

ராமேசுவரம் ராமநாதசாமி கோவிலில் தல வரலாற்றை விளக்கக்கூடிய ராமலிங்க பிரதிஷ்டை திருவிழா ஆண்டுதோறும் நடைபெறுவது வழக்கம். இந்த ஆண்டுக்கான திருவிழா இன்று (வெள்ளிக்கிழமை) தொடங்கி 3 நாட்கள் நடைபெறுகிறது.

முதல் நாளான இன்று மாலை 5 மணி அளவில் திட்டக்குடி சந்திப்பு சாலையில் துர்க்கை அம்மன் கோவில் அருகே தங்க ராவணசம்ஹார நிகழ்ச்சி நடைபெறுகிறது. நாளை பகல் 1.30 மணி அளவில் தனுஷ்கோடி கோதண்டராமர் கோவிலில் விபீஷணர் பட்டாபிஷேக நிகழ்ச்சி நடைபெறுகிறது. திருவிழாவின் சிகர நிகழ்ச்சியாக 16-ந் தேதி பகல் 12.30 மணியளவில் ராமலிங்க பிரதிஷ்டை விழா நடைபெறுகிறது.

இதுகுறித்து கோவில் இணை ஆணையர் சிவராம்குமார் கூறும்போது, "ராமலிங்க பிரதிஷ்டை திருவிழாவின் 2-வது நாளில் (அதாவது நாளை) கோவிலில் இருந்து ராமபிரான் மற்றும் விபீஷணர் பட்டாபிஷேக நிகழ்ச்சிக்காக தனுஷ்கோடி கோதண்டராமர் கோவிலுக்கு எழுந்தருளும் நிகழ்ச்சி நடக்கிறது. அதனை முன்னிட்டு நாளை அதிகாலை 2:30 மணியளவில் கோவில் நடைதிறக்கப்பட்டு 3 முதல் 3.30 மணி வரை ஸ்படிகலிங்க தரிசனம் நடைபெறும். தொடர்ந்து சாயரட்சபூஜை, கால பூஜைகள் நடைபெற்று காலை 7 மணிக்கு கோவில் நடை சாத்தப்படும். அதனால் நாளை காலை 7 மணி முதல் மாலை 5 மணி வரை கோவிலில் உள்ள தீர்த்த கிணறுகளில் புனித நீராடவும், பக்தர்கள் சாமி தரிசனம் செய்யவும் அனுமதி இல்லை. மாலை 5 மணிக்கு பிறகு கோவில் நடை திறக்கப்பட்டு வழக்கம்போல் பக்தர்கள் தரிசனம் செய்ய அனுமதிக்கப்படுவார்கள்" என கூறினார்.