சென்னிமலை

தினத்தந்தி செய்தி எதிரொலியாக சென்னிமலையில் அட்டகாசம் செய்யும் குரங்குகளை பிடிக்க கூண்டு அமைக்கப்பட்டுள்ளது.

குரங்குகள் அட்டகாசம்

சென்னிமலை வனப்பகுதியில் இருந்த குரங்குகள் உணவு மற்றும் தண்ணீரை தேடி சென்னிமலை நகர பகுதிக்கு வந்துவிட்டன. வீட்டு மொட்டை மாடிகளில் காய வைத்திருக்கும் உணவு பொருட்களை எடுத்து தின்பது, குழந்தைகள் மற்றும் பெண்களை அச்சுறுத்துவது. கடைகளில் உள்ள பொருட்களை நாசப்படுத்துவது. கேபிள் ஒயர்களை அறுப்பது என நாளுக்கு நாள் குரங்குகளின் அட்டகாசம் அதிகரித்தது.

இதனால் சென்னிமலையில் அட்டகாசம் செய்யும் குரங்குகளை வனத்துறையினர் கூண்டு வைத்து பிடிக்க நடவடிக்கை எடுக்க வேண்டும் என பொதுமக்கள், சமூக ஆர்வலர்கள் கே.குணசேகரன், கே.சத்தியமூர்த்தி மற்றும் பல்வேறு கடை உரிமையாளர்கள் ஈரோடு வனத்துறை உயர் அதிகாரிகளுக்கு கோரிக்கை விடுத்தனர். மேலும் இதுகுறித்த செய்தி தினத்தந்தியில் படத்துடன் பிரசுரிக்கப்பட்டது.

கூண்டுக்குள் சிக்கின

இந்த நிலையில் ஈரோடு வனச்சரகர் உத்தரவின் பேரில் வனத்துறை ஊழியர்கள் நேற்று சென்னிமலையில் குரங்குகளை பிடிக்க பல்வேறு இடங்களில் கூண்டுகள் அமைத்தார்கள். கூண்டில் குரங்குகளுக்கு பிடித்தமான பழ வகைகள் வைக்கப்பட்டு இருந்தன. அதை தின்பதற்காக கூண்டுக்குள் நுழைந்த 7 குரங்குகள் கூண்டில் சிக்கிக்கொண்டன. அவற்றை வனப்பகுதியில் விடுவதற்காக வனத்துறையினர் கொண்டு சென்றார்கள்.

இதுபற்றி அப்பகுதி மக்கள் கூறுகையில் சென்னிமலை நகர பகுதியில் உள்ள அனைத்து குரங்குகளையும் வனத்துறையினர் கூண்டு வைத்து பிடிக்க வேண்டும். இல்லை என்றால் மீண்டும் அட்டகாசம் செய்ய தொடங்கிவிடும் என்றார்கள்.