ஜூன் 4-ல் வாக்கு எண்ணிக்கை; தேர்தல் முடிவை அறிய 45 நாட்கள் காத்திருக்க வேண்டிய தமிழகம்

புதுடெல்லி,

நாடாளுமன்ற மக்களவை தேர்தலுக்கான தேதி இன்று அறிவிக்கப்படும் என்று இந்திய தலைமை தேர்தல் ஆணையம் அறிவித்து இருந்தது. இதன்படி, இன்று மதியம் அதற்கான அறிவிப்பு வெளியிடப்பட்டது. இதில், நாடு முழுவதும் 7 கட்டங்களாக மக்களவை தேர்தல் நடைபெறும் என்று தேர்தல் ஆணையம் அறிவித்து உள்ளது.

கடந்த 2019-ம் ஆண்டு மக்களவை தேர்தலையொட்டி மார்ச் 10-ந்தேதி தேர்தலுக்கான தேதி அறிவிக்கப்பட்டது. இதன்படி, ஏப்ரல் 11-ந்தேதி முதல், தேர்தல் தொடங்கி 7 கட்டங்களாக நடந்து முடிந்தது. அந்த தேர்தலுக்கான முடிவுகள் மே 23-ந்தேதி அறிவிக்கப்பட்டன. இந்த சூழலில், 2024-ம் ஆண்டில் இதேபோன்று 7 கட்டங்களாக தேர்தல் நடைபெறும் என அறிவிப்பு வெளிவந்து உள்ளது.

இதில், தமிழகத்தில் மொத்தமுள்ள 39 மக்களவை தொகுதிகள் மற்றும் புதுச்சேரியில் ஒரு தொகுதி என மொத்தம் 40 தொகுதிகளுக்கும் ஏப்ரல் 19-ந்தேதி வாக்கு பதிவு நடைபெற உள்ளது. இந்த தேர்தல் ஒரே கட்டத்தில் நடத்தி முடிக்கப்பட திட்டமிடப்பட்டு உள்ளது. இதேபோன்று, கன்னியாகுமரிக்கு உட்பட்ட விளவங்கோடு சட்டமன்ற தொகுதிக்கு ஏப்ரல் 19-ந்தேதி இடைத்தேர்தல் நடைபெற உள்ளது.

எனினும், வாக்கு எண்ணிக்கை ஜூன் 4-ந்தேதி நடைபெறும். தமிழகம் மற்றும் புதுச்சேரியில் முதல் கட்டத்தில் தேர்தல் நடைபெறும் சூழலில், வாக்கு பதிவு நடந்து முடிந்து ஏறக்குறைய 45 நாட்களுக்கு பின்னரே சட்டசபை இடைத்தேர்தல் மற்றும் மக்களவை தேர்தலுக்கான முடிவுகள் தெரிய வரும்.