சமையல் கியாஸ் விலையேற்றம் நவீன விறகு அடுப்புக்கு மாறும் இல்லத்தரசிகள்

சர்வதேச சந்தையில் கச்சா எண்ணெய் விலையின் ஏற்ற இறக்கத்துக்கு ஏற்ப இந்தியாவில் பெட்ரோலிய பொருட்களின் விலை நிர்ணயம் செய்யப்பட்டு வருகிறது. அதன்படி பெட்ரோல் மற்றும் டீசல் விலையானது தினசரியும், சமையல் கியாஸ் சிலிண்டர் விலை மாதம் ஒருமுறை அல்லது 2 முறையும் மாற்றி அமைக்கப்பட்டு வருகின்றன.

அந்தவகையில் கடந்த 2020-ம் ஆண்டு மே மாதம் ரூ.569.50-க்கு விற்பனை செய்யப்பட்ட 14.2 கிலோ கொண்ட வீட்டு உபயோக கியாஸ் சிலிண்டர், கடந்த ஆண்டு பிப்ரவரி மாதம் ரூ.810-ஐ எட்டியது. பின்னர் இது இந்த ஆண்டு மே மாதத்தில் ஆயிரம் ரூபாயை கடந்து ஆயிரத்து 18 ரூபாய் 50 காசுகளுக்கு விற்பனை செய்யப்பட்டது. அதைத் தொடர்ந்து மேலும் உயர்ந்து கடந்த ஜூலை மாதம் வீட்டு உபயோக கியாஸ் சிலிண்டர் விலை ஆயிரத்து 68 ரூபாய் 50 காசுகளுக்கு விற்பனை செய்யப்பட்டது. தற்போதுவரை இந்த விலையில் ஏற்ற இறக்கமின்றி விற்பனை செய்யப்பட்டு வருகிறது.

அதேபோன்று 19 கிலோ எடை கொண்ட வணிக பயன்பாட்டு சமையல் கியாஸ் சிலிண்டர் விலை கடந்த 2020-ம் ஆண்டு மே மாதம் ஆயிரத்து 144 ரூபாய் 50 காசுகளாக இருந்தது. படிப்படியாக விலை உயர்ந்து கடந்த ஆண்டு பிப்ரவரி மாதம் ஆயிரத்து 654 ரூபாய் 50 காசுகளுக்கு விற்பனை செய்யப்பட்டது. அதே ஆண்டு நவம்பர் மாதத்தில் இது 2 ஆயிரம் ரூபாயை கடந்து 2 ஆயிரத்து 133 ரூபாய்க்கு விற்பனை செய்யப்பட்டது.

ரத்தக்கண்ணீரை வரவழைக்கிறது

அதைத் தொடர்ந்து உச்சகட்டமாக கடந்த மே 1-ந் தேதி வணிக பயன்பாட்டு சமையல் கியாஸ் சிலிண்டர், 2 ஆயிரத்து 508 ரூபாய்க்கு விற்பனை செய்யப்பட்டது. பின்னர் படிப்படியாக குறைந்து கடந்த செப்டம்பர் மாதத்தில் 2 ஆயிரத்து 45 ரூபாய்க்கு விற்பனை செய்யப்பட்டது. அது கடந்த 1-ந் தேதி மேலும் ரூ.36 குறைந்து 2 ஆயிரத்து 9 ரூபாய் 50 காசுகளுக்கு விற்பனை செய்யப்பட்டு வருகிறது.

எனினும் ஐநூற்று சொச்சம் ரூபாய்க்கு வீட்டு உபயோகத்துக்கான சமையல் கியாஸ் சிலிண்டரை வாங்கி வந்த இல்லத்தரசிகளுக்கும், ஆயிரம் ரூபாய்க்குள் வணிக பயன்பாட்டு சமையல் கியாஸ் சிலிண்டரை வாங்கி வந்த வணிகர்களுக்கும் தற்போதைய விலையேற்றமானது கண்களில் ரத்தக்கண்ணீரை வரவழைக்கிறது என்றுதான் சொல்லவேண்டும். கொரோனா தொற்று காலத்தில் போதுமான வருமானம் இன்றி தவித்த மக்களை இந்த சமையல் கியாஸ் விலை ஏற்றம் விழிபிதுங்கச் செய்தது.

எனவே, இந்த சமையல் கியாஸ் சிலிண்டருக்கு மாற்றாக ஒரு பொருள் கிடைக்காதா என்று ஏங்கிக்கொண்டிருந்தவர்களுக்கு, மின்சார உதவியுடன் இயங்கும் நவீன விறகு அடுப்பு ஒரு வரப்பிரசாதமாகவே மாறியுள்ளது. இல்லத்தரசிகள் சமையல் கியாஸ் பயன்பாட்டை குறைத்துக்கொள்ளும் வகையில் படிப்படியாக இந்த நவீன விறகு அடுப்புக்கு மாறிவருகின்றனர்.

நவீன விறகு அடுப்பு கண்டுபிடிப்பு

இதுகுறித்து சென்னை அடையாறைச் சேர்ந்த நவீன விறகு அடுப்பு விற்பனை நிறுவன உரிமையாளர் ராஜேந்திரன் கூறியதாவது:-

கொரோனா தொற்றுக்கு முன்பே சமையல் கியாஸ் சிலிண்டர் விலையேற்றம் காரணமாக நவீன விறகு அடுப்பு கண்டுபிடிக்கப்பட்டு விற்பனைக்கு கொண்டுவரப்பட்டது. ஆனால், கொரோனா தொற்றால் கடந்த 2 வருடங்களாக இதன் விற்பனை முடங்கியது. மேலும், இந்த நவீன விறகு அடுப்பு குறித்து பெரும்பாலான மக்களுக்கு தெரியவில்லை. ஒரு வீட்டு உபயோக சமையல் கியாஸ் சிலிண்டரில் சமைக்கப்படும் உணவை இந்த அடுப்பில் 200 ரூபாய் விலையிலான விறகில் சமைத்துவிட முடியும்.

விறகு, வறட்டி, கொட்டாங்குச்சி, முந்திரி தோல் போன்ற முற்றிலும் இயற்கையான பொருட்களைப் பயன்படுத்தி இந்த நவீன விறகு அடுப்பை எரிக்கலாம்.

ரூ.5 ஆயிரம் முதல் 1½ லட்சம் வரை

இந்த அடுப்பில் ஊதுகுழல் மூலம் அனுப்பப்படும் காற்றை, மின்சார உதவியுடன் 'புளோயர்' மூலம் ஒரே சீராக செலுத்தி விறகை முற்றிலும் எரியவைக்கிறோம். இதனால், நெருப்பு முழுமையாக கிடைப்பதுடன், புகையும் அதிகம் வருவது இல்லை. இதனால், சமையல் கியாஸ் அடுப்புக்கு மாற்றாக பலரும் இந்த நவீன விறகு அடுப்புக்கு மாறி வருகின்றனர். ஓட்டல்கள், தங்கும் விடுதிகள், மெஸ், பேக்கரி போன்றவற்றிலும் தற்போது இந்த அடுப்பு பயன்படுத்தப்பட்டு வருகிறது.

சமைக்கும் அளவுக்கு ஏற்ப ரூ.5 ஆயிரம் முதல் ரூ.28 ஆயிரம் வரையிலான விலையில் இந்த அடுப்புகள் கிடைக்கின்றன.

ஓட்டல்களுக்கு தேவையான பெரிய அளவிலான அடுப்புகளும் 1½ லட்சம் ரூபாய் வரை விற்பனைக்கு தயாராக உள்ளன.

இந்த நவீன விறகு அடுப்புகளில் இதுவரை எந்தவிதமான குறைபாடுகளும் ஏற்படவில்லை. இந்த அடுப்புகளுக்கு குறைந்தபட்சம் 10 வாட்சில் இருந்து அதிகபட்சமாக 40 வாட்ஸ் குண்டு பல்புக்கு ஆகும் மின்சாரமே செலவாகிறது.

இவ்வாறு அவர் கூறினார்.