அக்னி வீரர்களுக்கு ரெயில்வேயில் அலுவலர் அல்லாத பணியிடங்களில் இட ஒதுக்கீடு - இந்திய ரெயில்வே முடிவு

புதுடெல்லி,

அக்னி வீரர்களுக்கு ரெயில்வே துறையில் அலுவலர் அல்லாத பணிகளில் இட ஒதுக்கீடு வழங்க இந்திய ரெயில்வே முடிவு செய்துள்ளது. இதன்படி நேரடி பணியாளர் தேர்வு அடிப்படையில் நிலை 1 பணிகளில் 10 சதவீத இட ஒதுக்கீடு, நிலை 2 மற்றும் அலுவலர் அல்லாத பணிகளில் 5 சதவீத இட ஒதுக்கீடு வழங்க தீர்மானிக்கப்பட்டுள்ளது.

இவர்களுக்கு பணியாளர் தேர்வின் போது உடற்தகுதி தேர்வில் இருந்து விலக்கு அளிக்கப்படும். முதல் பிரிவு அக்னி வீரர்களுக்கு பணியாளர் தேர்வின் போது வயது உச்சவரம்பில் 5 ஆண்டுகள் வரை சலுகையும், அடுத்தடுத்த பிரிவு அக்னி வீரர்களுக்கு 3 ஆண்டுகள் வரை சலுகையும் அளிக்கப்படும். இது தொடர்பாக அனைத்து பொது மேலாளர்களுக்கும் ரெயில்வே வாரியம் சார்பில் கடிதம் அனுப்பப்பட்டுள்ளது.