டெல்லி செங்கோட்டை மீது லேசான மழை பெய்யும்: வானிலை மையம்

புதுடெல்லி,

நாடு முழுவதும் இன்று சுதந்திர தின கொண்டாட்டம் நடைபெற உள்ளது. பிரதமர் மோடி டெல்லி செங்கோட்டையில் தேசிய கொடியை ஏற்றுவதற்கான ஏற்பாடுகள் தயார் செய்யப்பட்டு உள்ளன. இதன்பின் அவர், செங்கோட்டையில் இருந்து தொடர்ந்து 11-வது முறையாக நாட்டு மக்களுக்கு உரையாற்றுவார்.

இதனை முன்னிட்டு முக்கிய இடங்களில் போலீசாரின் பாதுகாப்பு பலப்படுத்தப்பட்டு உள்ளது. பாதுகாப்பு படையினரும் தீவிர கண்காணிப்பு மற்றும் ரோந்து பணிகளில் ஈடுபட்டு வருகின்றனர்.

நாட்டின் 78-வது சுதந்திர தினத்தில் டெல்லி செங்கோட்டையில் தேசிய கொடி ஏற்றப்படும் சூழலில், இந்திய வானிலை ஆய்வு மையம் வெளியிட்ட செய்தியில், அதிகாலை 4 மணி முதல் 8 மணி வரையும் மற்றும் காலை 8 மணி முதல் 12 மணி வரையும் டெல்லி செங்கோட்டை மீது லேசான மழை பெய்யும் என தெரிவித்து உள்ளது.

இன்றைய தினம் மதியம் மற்றும் இரவிலும் லேசான மழை பெய்ய வாய்ப்புள்ளது என்றும் தெரிவிக்கப்பட்டு உள்ளது.