காணாமல்போன 4½ லட்சம் குழந்தைகள் மீட்பு - மத்திய மந்திரி ஸ்மிரிதி இரானி

காணாமல்போன குழந்தைகள் உள்ளிட்டோர் குறித்த தேசிய வருடாந்திர விவாத நிகழ்வு டெல்லியில் நடைபெற்றது.

இணையதளம்

அதில், மத்திய பெண்கள் மற்றும் குழந்தைகள் மேம்பாட்டுத்துறை மந்திரி ஸ்மிரிதி இரானி பேசியதாவது:-

காணாமல்போன குழந்தைகளை கண்டுபிடிக்க உதவும்விதமாக, அவர்களைப் பற்றி சம்பந்தப்பட்ட குடும்பத்தினர் பதிவு செய்வதற்காக மத்திய பெண்கள் மற்றும் குழந்தைகள் மேம்பாட்டுத்துறை அமைச்சகத்தால் 'கோயா பாயா' இணையதளம் கடந்த 2015-ம் ஆண்டு தொடங்கப்பட்டது.

குடும்பத்தில் ஒப்படைப்பு

அதன்பின், சுமார் 4½ லட்சம் குழந்தைகள் அதாவது 4 லட்சத்து 46 ஆயிரம் குழந்தைகள் கண்டுபிடிக்கப்பட்டுள்ளனர். அவர்களில் 3 லட்சத்து 97 ஆயிரத்து 530 குழந்தைகளின் பெற்றோர் உறுதிசெய்யப்பட்டு, குடும்பத்தில் ஒப்படைக்கப்பட்டுள்ளனர்.

கடந்த 2021-ம் ஆண்டு முதல் சிறார் நீதிச்சட்டத்திருத்தம் அமலுக்கு கொண்டுவரப்பட்டுள்ளது. அதன்படி, கோர்ட்டுகளுக்கு பதிலாக மாவட்ட மாஜிஸ்திரேட்டுகளுக்கு, தத்து கொடுக்கும் உத்தரவுக்கான பொறுப்பு வழங்கப்பட்டுள்ளது. அதன் மூலம், 2 ஆயிரத்து 600 குழந்தைகள் தத்து கொடுக்கப்பட்டுள்ளனர்.

லாப நோக்கம் கூடாது

காணாமல்போகும் குழந்தைகள் உள்ளிட்டோரை கையாளுவோர், லாபம் ஒன்றையே நோக்கமாக கொண்டு செயல்படக்கூடாது.

குழந்தைகள் நலத்துறைக்கான மத்திய அரசின் பட்ஜெட் ஒதுக்கீடு கடந்த 2009-10-ம் ஆண்டில் வெறும் ரூ.60 கோடியாக இருந்தது. கடந்த ஆண்டு அது ரூ.14 ஆயிரத்து 172 கோடியாக உயர்த்தப்பட்டுள்ளது.

இவ்வாறு அவர் பேசினார்.