சட்டசபை தேர்தல் வாக்குப்பதிவு நிறைவு: மத்தியப் பிரதேசத்தில் 71.16 சதவீதமும், சத்தீஷ்காரில் 68.15 சதவீத வாக்குகளும் பதிவு

மத்திய பிரதேசத்தில் மோரீனா மாவட்டத்தில், வாக்குப்பதிவின் போது இரு குழுக்களுக்கு இடையே மோதல் வெடித்துள்ளது. திமானி தொகுதியில் வாக்குச்சாவடி 147-148-ல் இரு தரப்பினரும் கற்களை கொண்டு தாக்கியதால் பரபரப்பு ஏற்பட்டது. தாக்குதல் சம்பவத்தை தொடர்ந்து அங்கு பதற்றமான சூழல் நிலவுகிறது. இதையடுத்து, பாதுகாப்பு பலப்படுத்தப்பட்டுள்ளது. 

மத்திய பிரதேச சட்டமன்ற தேர்தல்: மத்திய அமைச்சரும் பாஜக தலைவர்களில் ஒருவருமான ஜோதிராதித்ய சிந்தியா, கவாலியரில் உள்ள வாக்குச்சாவடி ஒன்றில் தனது வாக்கினை பதிவு செய்தார்.

சத்தீஷ்கரில் இன்று காலை 9 மணி நிலவரப்படி 5.71 சதவிகித வாக்குகள் பதிவாகியுள்ளன. மத்திய பிரதேசத்தில் 11.13 சதவிகித வாக்குகள் பதிவாகியுள்ளன.

மத்திய பிரதேசத்தில் 150 தொகுதிகளுக்கு மேல் பாஜக வெற்றி பெறும் என்று அக்கட்சியின் தேசிய பொதுச்செயலாளர்களில் ஒருவரான கைலாஷ் விஜய்வர்கியா தெரிவித்துள்ளார். 

மத்திய பிரதேசத்தில் வாக்குப்பதிவு விறு விறுப்பாக நடைபெற்று வருகிறது. சிதி தொகுதியில் உள்ள வாக்குச்சாவடியில் காலை முதலே ஆர்வத்துடன் வாக்காளர்கள் தங்கள் ஜனநாயக கடமையை ஆற்றி வருகின்றனர். 

சத்தீஷ்காரில் 2 ஆம் கட்ட வாக்குப்பதிவு தொடங்கியுள்ளது. வாக்குப்பதிவு விறு விறுப்பாக நடைபெற்று வரும் நிலையில், சத்தீஷ்கார் மாநில பாஜக தலைவரும் லோர்மி தொகுதி வேட்பாளருமான அருண் சாவோ, பிலாஸ்பூரில் உள்ள கோவிலில் சாமி தரிசனம் செய்தார்.

மத்திய பிரதேசத்தில் ஒரே கட்டமாக 230- தொகுதிகளுக்கும் வாக்குப்பதிவு தொடங்கியது. காலை 7 மணிக்கு தொடங்கியுள்ள் இந்த வாக்குப்பதிவு மாலை 5 மணி வரை நடைபெறுகிறது

மத்திய பிரதேசத்தில் தற்போது பாஜக ஆட்சி நடைபெற்று வருகிறது. முதல் மந்திரியாக சிவராஜ் சிங் சவுகான் பதவி வகித்து வருகிறார். மத்திய பிரதேசத்தில் பாஜக- காங்கிரஸ் இடையே நேரடி போட்டி உள்ளது.   

சத்தீஷ்காரில் பகுஜன் சமாஜ் கட்சி, ஆம் ஆத்மி மற்றும் மாநில கட்சிகள் களத்தில் இருந்தபோதிலும், காங்கிரஸ்-பா.ஜனதா இடையே நேரடிப்போட்டி நிலவுகிறது.