இப்படிக்கு தேவதை

தற்போதைய காலத்தில் கணவன்-மனைவி இருவருமே சம்பாதிப்பது, பொருளாதார ரீதியில் நிறைவாக வாழ்வதற்கு உதவும். முதலில் உங்கள் கணவர் உங்களை வேலைக்குச் செல்ல வேண்டாம் என கூறுவதற்கான  காரணம் என்னவென்று கண்டறியுங்கள். ஒருவேளை நீங்கள் வேலைக்கு செல்வதால் வீட்டை கவனிப்பதற்கு முடியாமல் போய்விடும் என்று நினைக்கிறாரா? வீட்டு வேலைகள் செய்வதில் அவரது உதவியை நீங்கள் எதிர்பார்க்கக்கூடும் என்று யோசிக்கிறாரா? அல்லது உங்கள் வருமானம் பொருளாதார ரீதியாக போதாது என தயங்குகிறாரா? என அறிந்துகொள்ளுங்கள். பின்பு வேலைக்குச் செல்ல வேண்டும் என்ற உங்கள் முடிவு, எந்தவிதத்திலும் அவரை பாதிக்காது என்று அவருக்கு உறுதி அளியுங்கள். அவருக்கு பொறுமையாக புரிய வையுங்கள். இதன் மூலம் அவருடைய முடிவு மாறும்.

மேலும், தற்போது பெண்கள் வேலைக்காக வெளியே செல்லாமல் வீட்டில் இருந்து சம்பாதிக்கும் வகையில் பல வாய்ப்புகள் உள்ளன. அவற்றையும் கருத்தில்கொண்டு யோசியுங்கள். நல்ல தீர்வு கிடைக்கும்.

ஒரு உறவில் உடல் ரீதியான தாக்குதல் கட்டாயமாக தவிர்க்கப்பட வேண்டும். உங்கள் கணவர் கையை உயர்த்தும்போது, நீங்கள் எப்படி உணருகிறீர்கள் என்று அவரிடம் வெளிப்படையாகப் பேசுங்கள். நீங்கள் இதைப் பேசும்போது அவரைப் பற்றி எந்த விதத்திலும் விமர்சிக்காமல், நீங்கள் எப்படி உணர்கிறீர்கள் என்பதை மட்டும் கூறுங்கள். 

மேலும் அவரை கையை உயர்த்தத் தூண்டுவது எது? என்று அவரிடம் கேளுங்கள். உங்கள் குரல், உடல் மொழி, நீங்கள் பயன்படுத்தும் வார்த்தைகள் என அவரை கோபப் படுத்துவது எது? என்பதை புரிந்துகொண்டு அதை மாற்றிக்கொள்வதற்கு முயற்சி செய்யுங்கள். கணவன்-மனைவி இடையே ஆரோக்கியமான விவாதங்கள் நடைபெறலாம். அவற்றை வாக்குவாதங்களாக மாற்றாமல் பார்த்துக்கொள்ளும் பொறுப்பு இருவருக்குமே உள்ளது.