ஆண்கள் டென்னிஸ் சாம்பியன்ஷிப்; அலெக்ஸ் டி மினாரை வீழ்த்திய ஜன்னிக் சின்னெர்

துரின்,

உலகின் டாப்-8 முன்னணி வீரர்கள் மட்டும் பங்கேற்கும் ஏ.டி.பி. இறுதி சுற்று எனப்படும் ஆண்கள் டென்னிஸ் சாம்பியன்ஷிப் போட்டி இத்தாலியில் உள்ள துரின் நகரில் நேற்று தொடங்கியது. இதன் ஒற்றையர் பிரிவில் கலந்து கொள்ளும் 8 வீரர்கள் 'லீ நாஸ்டாசே', 'ஜான் நியூகாம்பே' என்று இரு பிரிவாக பிரிக்கப்பட்டுள்ளனர்.

'லீ நாஸ்டாசே' பிரிவில் 'நம்பர் ஒன்' வீரர் ஜானிக் சினெர் (இத்தாலி), முன்னாள் சாம்பியன் டேனில் மெத்வதேவ் (ரஷியா), 6-ம் நிலை வீரர் டெய்லர் பிரிட்ஸ் (அமெரிக்கா), முதல் முறையாக கால்பதிக்கும் அலெக்ஸ் டி மினாரும் (ஆஸ்திரேலியா), 'ஜான் நியூகாம்பே' பிரிவில் 2 முறை சாம்பியன் அலெக்சாண்டர் ஸ்வெரேவ் (ஜெர்மனி), தரவரிசையில் 3-வது இடம் வகிக்கும் கார்லஸ் அல்காரஸ் (ஸ்பெயின்), 7-ம் நிலை வீரர் கேஸ்பர் ரூட் (நார்வே), 9-ம் நிலை வீரர் ஆந்த்ரே ரூப்லெவும் (ரஷியா) இடம் பிடித்துள்ளனர்.

இதில் ஒவ்வொரு வீரரும் தங்கள் பிரிவில் இடம் பிடித்துள்ள மற்ற வீரர்களுடன் தலா ஒரு முறை மோத வேண்டும். லீக் சுற்று முடிவில் ஒவ்வொரு பிரிவிலும் முதல் 2 இடங்களை பிடிக்கும் வீரர்கள் அரையிறுதிக்கு முன்னேறுவார்கள். இந்நிலையில், இந்த தொடரில் இன்று நடைபெற்ற ஆண்கள் ஒற்றையர் பிரிவு ஆட்டம் ஒன்றில் இத்தாலியின் ஜன்னிக் சின்னெர், ஆஸ்திரேலியாவின் அலெக்ஸ் டி மினார் உடன் மோதினார்.

இந்த போட்டியில் தொடக்கம் முதலே அபார ஆட்டத்தை வெளிப்படுத்திய ஜன்னிக் சின்னெர் 6-3, 6-4 என்ற நேர் செட் கணக்கில் ஆஸ்திரேலியாவின் அலெக்ஸ் டி மினாரை வீழ்த்தி வெற்றி பெற்றார். இந்த தொடரில் ஆண்கள் ஒற்றையர் பிரிவில் இன்று நடைபெறும் மற்றொரு ஆட்டத்தில் கார்லஸ் அல்கராஸ் (ஸ்பெயின்), கேஸ்பர் ரூட் (நார்வே) உடன் மோத உள்ளார்.