புரோ கபடி லீக்: உ.பி. யோத்தாஸ் - ஜெய்ப்பூர் பிங்க் பாந்தர்ஸ் அணிகள் இன்று மோதல்

நொய்டா,

12 அணிகள் இடையிலான 11-வது புரோ கபடி லீக் போட்டி தற்போது நொய்டாவில் நடந்து வருகிறது. இதில் ஒவ்வொரு அணியும் மற்ற அணிகளுடன் தலா 2 முறை மோத வேண்டும். லீக் சுற்று முடிவில் புள்ளி பட்டியலில் முதல் இரு இடங்களை பிடிக்கும் அணிகள் நேரடியாக அரையிறுதிக்கு முன்னேறும். 3-6 இடங்களை பிடிக்கும் அணிகள் வெளியேற்றுதல் சுற்றில் சந்திக்கும். இதில் வெற்றி பெறும் 2 அணிகள் அரையிறுதிக்கு தகுதி பெறும். லீக் சுற்று ஆட்டம் டிசம்பர் 24-ந் தேதி முடிவுக்கு வருகிறது.

11-வது புரோ கபடி லீக் இறுதிப்போட்டி மராட்டிய மாநிலம் புனேவில் உள்ள பாலேவாடி ஸ்போர்ட்ஸ் காம்ப்ளக்சில் டிசம்பர் 29-ந் தேதி நடக்கிறது. முன்னதாக இதே மைதானத்தில் அரையிறுதி ஆட்டங்கள் 27-ந் தேதியும், வெளியேற்றுதல் சுற்று 26-ந் தேதியும் நடைபெறும் என்று தெரிவிக்கப்பட்டுள்ளது.

இந்நிலையில், இந்த தொடரில் இன்று 2 லீக் ஆட்டங்கள் நடைபெற உள்ளன. அதில் இரவு 8 மணிக்கு தொடங்கும் முதல் ஆட்டத்தில் உ.பி. யோத்தாஸ் - ஜெய்ப்பூர் பிங்க் பாந்தர்ஸ் அணிகள் மோத உள்ளன. தொடர்ந்து இரவு 9 மணிக்கு தொடங்கும் ஆட்டத்தில் யு மும்பா - தெலுங்கு டைட்டன்ஸ் அணிகள் மோதுகின்றன.

இந்த தொடரில் இதுவரை நடந்துள்ள லீக் ஆட்டங்களின் முடிவில் புள்ளிப்பட்டியலில் யு மும்பா 2-வது இடத்திலும், தெலுங்கு டைட்டன்ஸ் 4-வது இடத்திலும், ஜெய்ப்பூர் பிங்க் பாந்தர்ஸ் 7-வது இடத்திலும், உ.பி. யோத்தாஸ் 8-வது இடத்திலும் உள்ளன.