புரோ கபடி லீக்: அரியானா ஸ்டீலர்ஸ் - புனேரி பால்டன் அணிகள் இன்று மோதல்

நொய்டா,

11-வது புரோ கபடி லீக் தொடர் கடந்த அக்டோபர் 18-ம் தேதி ஐதராபாத்தில் தொடங்கியது. இந்த தொடரின் முதற்கட்ட லீக் ஆட்டங்கள் ஐதராபாத்தில் நடந்து முடிந்தன. இதையடுத்து தொடரின் 2-வது கட்ட லீக் ஆட்டங்கள் நொய்டாவில் நடைபெற்று வருகின்றன.

இந்நிலையில், இந்த தொடரில் இன்று 2 லீக் ஆட்டங்கள் நடைபெற உள்ளன. அதில் இரவு 8 மணிக்கு தொடங்கும் முதல் ஆட்டத்தில் அரியானா ஸ்டீலர்ஸ் - புனேரி பால்டன் அணிகள் மோத உள்ளன. தொடர்ந்து இரவு 9 மணிக்கு தொடங்கும் ஆட்டத்தில் பெங்கால் வாரியர்ஸ் - குஜராத் ஜெயன்ட்ஸ் அணிகள் மோதுகின்றன.

இந்த தொடரில் இதுவரை நடந்துள்ள லீக் ஆட்டங்களின் முடிவில் புள்ளிப்பட்டியலில் அரியானா ஸ்டீலர்ஸ் முதலிடத்திலும், புனேரி பால்டன் 5-வது இடத்திலும், பெங்கால் வாரியர்ஸ் 10-வது இடத்திலும், குஜராத் ஜெயன்ட்ஸ் 11-வது இடத்திலும் உள்ளன.