ஆக்கி இந்தியா லீக்: தமிழக அணி தோல்வி

ரூர்கேலா,

8 அணிகள் இடையிலான 6-வது ஆக்கி இந்தியா லீக் போட்டி ஒடிசாவில் உள்ள ரூர்கேலாவில் நேற்று முன்தினம் தொடங்கியது. இதில் நேற்றிரவு நடந்த 3-வது லீக் ஆட்டத்தில் சூர்மா ஆக்கி கிளப்- தமிழ்நாடு டிராகன்ஸ் அணிகள் மல்லுக்கட்டின. விறுவிறுப்பான இந்த ஆட்டம் வழக்கமான நேரத்தில் 1-1 என்ற கோல் கணக்கில் சமன் ஆனது. இதையடுத்து வெற்றி, தோல்வியை நிர்ணயிக்க ஷூட்-அவுட் விதி கடைப்பிடிக்கப்பட்டது.

இதில் சூர்மா கிளப் 4-1 என்ற கோல் கணக்கில் தமிழ்நாடு டிராகன்ஸ் அணியை பதம்பார்த்து வெற்றியுடன் தொடங்கியது. மற்றொரு ஆட்டத்தில் ஷராச்சி ரார் பெங்கால் டைகர்ஸ் 3-2 என்ற கோல் கணக்கில் ஐதராபாத் டூபான்சை வீழ்த்தியது. இன்று இரவு 8.15 மணிக்கு நடைபெறும் ஆட்டத்தில் உ.பி. ருத்ராஸ் - வேதாந்தா கலிங்கா லான்சர்ஸ் அணிகள் மோதுகின்றன.