இன்றைய முக்கிய செய்திகள் சில வரிகளில்.. 27-02-2025

குஜராத்தில் ஜனாதிபதி திரவுபதி முர்மு 2 நாட்கள் சுற்றுப்பயணம் மேற்கொள்கிறார். இதற்காக அவர் ஆமதாபாத் நகருக்கு இன்று மாலை வந்தடைந்து உள்ளார். இந்த பயணத்தின் ஒரு பகுதியாக அவர் பட்டமளிப்பு விழாவில் கலந்து கொள்ள இருக்கிறார்.

தொகுதி மறுசீரமைப்பு விவகாரத்தில் அமித்ஷா பேசுவது எதுவும் நம்பகத்தன்மையோடு இல்லை என்று கர்நாடக முதல்-மந்திரி சித்தராமையா கூறியுள்ளார்.

டெல்லி சட்டசபையின் துணை சபாநாயகராக 6 முறை பா.ஜ.க. எம்.எல்.ஏ.வான மோகன் சிங் பிஸ்த் இன்று தேர்ந்தெடுக்கப்பட்டு உள்ளார்.

கொளத்தூரில் கட்டப்பட்டுள்ள உயர் சிறப்பு மருத்துவமனையான பெரியார் அரசு மருத்துவமனையை முதல்-அமைச்சர் மு.க.ஸ்டாலின் திறந்து வைத்தார். கல்வியும் மருத்துவமும் திராவிட மாடல் அரசின் இரு கண்கள்; மருத்துவர்கள், செவிலியர்கள் நோயாளிகளை குடும்பத்தில் ஒருவராக பார்த்து சிகிச்சை அளியுங்கள் என்று முதல்-அமைச்சர் மு.க.ஸ்டாலின் கூறினார்.

சென்னை கொளத்தூரில் நடந்த பெரியார் அரசு மருத்துவமனை திறப்பு நிகழ்ச்சியில் பேசிய தமிழக முதல்-அமைச்சர் மு.க. ஸ்டாலின், உள்ளாட்சி அமைப்புகளில் மாற்றுத்திறனாளிகளுக்கு பிரதிநிதித்துவம் தரப்படும் என இன்று அறிவித்து உள்ளார்.

திண்டிவனத்தில் பாமக நிறுவனர் ராமதாஸ் வீடு முன் பாமக- விசிகவினர் மோதலில் ஈடுபட்டனர். அங்காளம்மன் கோவில் - மயானக் கொள்ளை ஊர்வலத்தின் போது மோதல் ஏற்பட்டதாக கூறப்படுகிறது. ஊர்வலத்தில் விசிகவினர் சிலர் வேலில் கட்சி கொடியை கட்டி நடனமாடியுள்ளனர் அதற்கு பாமகவினர் எதிர்ப்பு தெரிவித்ததால் வாக்குவாதம் ஏற்பட்டு கைகலப்பாக மாறியதாக கூறப்படுகிறது.

நடிகை விஜயலட்சுமி விவகாரத்தில் சுப்ரீம் கோர்ட்டில் சீமான் தரப்பில் மேல்முறையீடு செய்யப்பட்டுள்ளது. சென்னை ஐகோர்ட்டின் உத்தரவுக்கு எதிராக சுப்ரீம் கோர்ட்டில் சீமான் தரப்பு மேல்முறையீடு செய்துள்ளது.

நாம் தமிழர் கட்சியின் தருமபுரி மண்டல செயலாளர் அண்ணாதுரை அக்கட்சியில் இருந்து விலகுவதாக அறிவித்துள்ளார்.