இன்றைய முக்கிய செய்திகள் சில வரிகளில்.. 12-01-2025

இலங்கை கடற்படையால் சிறைபிடிக்கப்பட்ட தமிழ்நாட்டு மீனவர்களை விடுவிக்க நடவடிக்கை கோரி வெளியுறவுத்துறை மந்திரி ஜெய்சங்கருக்கு முதல்-அமைச்சர் மு.க.ஸ்டாலின் கடிதம் எழுதி உள்ளார்.

துபாய் கார் பந்தயத்தில் 992 பிரிவில் 3ஆவது இடம் பிடித்தது நடிகர் அஜித்குமாரின் அணி.

சீமான் பேச்சுக்கு நாதகவுக்குள் எதிர்ப்பு

பெரியார் தொடர்பாக சீமான் பேசியிருப்பது அவருடைய சொந்த கருத்தே ஒழிய, நாம் தமிழர் கட்சியின் ஒட்டு மொத்த கருத்து அல்ல. அவர் பேசியிருப்பது இந்துத்துவா சக்திகளின் வளர்ச்சிக்கு உதவுமே தவிர, தமிழ் தேசிய வளர்ச்சிக்கு உதவாது என நாதக மாநில ஒருங்கிணைப்பாளர் ஜெகதீச பாண்டியன் கூறியுள்ளார்.

தேசிய கீதம் விவகாரத்தில் முதல்-அமைச்சரின் கருத்து சிறுபிள்ளைத்தனமானது, அபத்தமானது. முதல்-அமைச்சரின் அகங்காரம் நல்லதல்ல என்று கவர்னர் மாளிகை செய்தி வெளியிட்டுள்ளது. 

திருப்பதி ஏழுமலையான் கோவிலில் உண்டியல் காணிக்கை எண்ணும் பணியின்போது 100 கிராம் தங்க பிஸ்கட்டை திருடிச் செல்ல முயன்ற ஒப்பந்த ஊழியர் பென்சிலய்யா (வயது 49) என்பவரை போலீசார் கைது செய்தனர்.

மாணவிகள் கழிப்பறை சுத்தம் செய்த விவகாரம்- தலைமை ஆசிரியை சஸ்பெண்ட்

தருமபுரி: மாணவிகளை கழிப்பறை சுத்தம் செய்ய வைத்த பெருங்காடு ஊராட்சி ஒன்றிய நடுநிலைப்பள்ளி தலைமை ஆசிரியை கலைவாணி பணியிடை நீக்கம் செய்யப்பட்டார். 5-ம் வகுப்பு பழங்குடியின மாணவிகள் 3 பேரை கழிப்பறையை சுத்தம் செய்ய வைத்ததாக புகார் எழுந்ததையடுத்து தருமபுரி மாவட்ட முதன்மைக் கல்வி அலுவலர் நடவடிக்கை எடுத்துள்ளார்.

இந்தியாவின் நிலக்கரி ஏற்றுமதி உயர்வு

நடப்பு நிதியாண்டின் ஏப்ரல் முதல் நவம்பர் வரையிலான காலகட்டத்தில் இந்தியாவின் நிலக்கரி இறக்குமதியானது 2 சதவீதம் அதிகரித்துள்ளது. இந்த காலகட்டத்தில் 182.02 மெட்ரிக் டன் நிலக்கரி இறக்குமதி செய்யப்பட்டிருப்பதாக மின் வணிக நிறுவனமான எம்ஜங்சன் சர்வீசஸ் லிமிடெட் தெரிவித்துள்ளது. கடந்த நிதியாண்டில் இதே காலகட்டத்தில் 178.17 மெட்ரிக் டன் நிலக்கரி இறக்குமதி செய்யப்பட்டதாகவும் தெரிவிக்கப்பட்டுள்ளது.

திருப்பூரில் போலி ஆதார் அட்டையை பயன்படுத்தி தங்கியிருந்த வங்காளதேச இளைஞர்கள் 31 பேர் கைது செய்யப்பட்டனர்.

அவர்கள் போலியான ஆதார் அட்டை கொடுத்து தனியார் பனியன் நிறுவனத்தில் வேலை பார்த்து வந்துள்ளனர். இதுபற்றி தகவல் அறிந்து தீவிரவாத தடுப்பு குழு போலீசார் சோதனையில் ஈடுபட்டனர். இதில், அருள்புரத்தில் 28 பேர், வீரபாண்டியில் 2 பேர், நல்லூரில் ஒருவர் கைது செய்யப்பட்டனர்.

சத்தீஷ்கார் மாநிலம் பிஜப்பூர் மாவட்டம், இந்திராவதி தேசிய பூங்காவில் உள்ள காட்டுப்பகுதியில் நடந்த துப்பாக்கி சண்டையில் 3 நக்சலைட்டுகளை பாதுகாப்பு படையினர் சுட்டுக்கொன்றனர்.