பொதுமக்களுக்கு பாதுகாப்பான குடிநீர் வழங்குவதை உறுதி செய்ய வேண்டும் - ஓ.பன்னீர்செல்வம்

சென்னை,

தமிழ்நாடு முன்னாள் முதல்-அமைச்சர் ஓ.பன்னீர்செல்வம் வெளியிட்டுள்ள அறிக்கையில் தெரிவித்திருப்பதாவது:-

பொதுமக்களுக்கும், தொழிற்சாலைகளுக்கும் பாதுகாப்பான குடிநீர் வழங்குவதும், குடிநீர் விநியோகத்தை கூட்டுக் குடிநீர்த் திட்டங்கள் மூலம் தேவைக்கேற்ப அதிகரிப்பதும் மாநில அரசின் தலையாய கடமைகளாகும். இந்தப் பணிகளை தமிழ்நாடு குடிநீர் வடிகால் வாரியம் மேற்கொண்டு வருகிறது. சென்னையைப் பொறுத்தவரை இந்தப் பணிகளை சென்னைப் பெருநகர் குடிநீர் வழங்கல் மற்றும் கழிவுநீரகற்று வாரியம் மேற்கொண்டு வருகிறது. இருப்பினும், பாதுகாக்கப்பட்ட குடிநீர் வழங்கப்படுகிறதா என்றால் நிச்சயம் இல்லை என்ற சூழ்நிலைதான் கடந்த 42 மாத கால தி.மு.க. ஆட்சியில் நிலவுகிறது.

குடிநீருடன் கழிவுநீர் கலப்பதாக பல இடங்களிலிருந்து புகார்கள் வந்த நிலையிலும் தி.மு.க. அரசு அதனை கண்டுகொள்வதில்லை. தி.மு.க. அரசின் அலட்சியப் போக்குக் காரணமாக, நேற்று இரண்டு பேர் உயிரிழந்துள்ளனர். 30-க்கும் மேற்பட்டோர் மருத்துவமனைகளில் சிகிச்சை பெற்று வருகின்றனர். உயிரிழந்தவர்களின் குடும்பத்தினருக்கு எனது ஆழ்ந்த இரங்கலையும், அனுதாபத்தினையும் தெரிவித்துக் கொள்வதோடு, மருத்துவமனைகளில் அனுமதிக்கப்பட்டுள்ளவர்கள் விரைந்து இல்லம் திரும்ப வேண்டுமென்ற எனது விருப்பத்தினைத் தெரிவித்துக் கொள்கிறேன்.

சென்னை, பரங்கிமலை பல்லாவரம் கண்டோன்மென்ட் பகுதி மற்றும் தாம்பரம் மாநகராட்சிக்குட்பட்ட காமராஜர் நகருக்கு பாலாற்று குடிநீர் விநியோகிக்கப்பட்டதாகவும், இந்தக் குடிநீரில், கழிவுநீர் கலந்து நிறம் மாறி இருந்ததாகவும், இதனை அருந்திய அப்பகுதி மக்களில் 40-க்கும் மேற்பட்டோருக்கு வாந்தி, பேதி மயக்கம் ஏற்பட்டு மருத்துவமனைகளில் அனுமதிக்கப்பட்டதாகவும், இவர்களில் இரண்டு பேர் பரிதாபமாக உயிரிழந்ததாகவும் பத்திரிகைகளில் செய்திகள் வந்துள்ளன. குடிநீரின் நிறம் மாறியுள்ளதாகவும், குடிநீரில் துர்நாற்றம் வீசுவதாகவும் அப்பகுதி மக்கள் கடந்த ஒரு மாதமாக புகார் தெரிவித்தும், அவற்றை தி.மு.க. அரசு அலட்சியப்படுத்தி விட்டதாகவும், மாறாக சுத்தமான குடிநீர் விநியோகிக்கப்படுவதாக அரசு அதிகாரிகள் தெரிவித்ததாகவும் அப்பகுதி மக்கள் தெரிவிக்கின்றனர். தி.மு.க. அரசின் அலட்சியப் போக்கு கடும் கண்டனத்திற்குரியது.

தி.மு.க. அரசின் மெத்தனப் போக்கே இரண்டு பேர் உயிரிழந்ததற்குக் காரணம் என்ற நிலையில், உயிரிழந்தவர்களின் குடும்பத்தினருக்கு தலா பத்து லட்சம் ரூபாய் நிவாரண உதவி வழங்கவும், மருத்துவமனையில் அனுமதிக்கப்பட்டுள்ளவர்களுக்கு உயர்தர மருத்துவ சிகிச்சை அளிக்கவும், பாதுகாக்கப்பட்ட குடிநீர் வழங்குவதை உறுதி செய்ய வேண்டுமென்றும் முதல்-அமைச்சரை அண்ணா திராவிட முன்னேற்றக் கழக தொண்டர்கள் உரிமை மீட்புக் குழுவின் சார்பில் வலியுறுத்திக் கேட்டுக் கொள்கிறேன். இவ்வாறு அதில் தெரிவித்துள்ளார்.