புயல் நாளை கரை கடக்கிறது.. பொதுமக்கள் வெளியே செல்ல வேண்டாம்

வங்கக்கடலில் நிலவும் ஆழ்ந்த காற்றழுத்த தாழ்வு மண்டலம் அடுத்த 3 மணி நேரத்தில் புயலாக வலுப்பெறும். நாளை மதியம் காரைக்கால் - மாமல்லபுரம் இடையே புதுச்சேரி அருகே கரையை கடக்கும் என்று இந்திய வானிலை ஆய்வு மையம் கூறியுள்ளது. புயல் கரையை கடக்கும்போது மணிக்கு 90 கிலோ மீட்டர் வேகத்தில் காற்று வீசும் என்று தெரிவிக்கப்பட்டுள்ளது. புயல் வலுப்பெறாது என தெரிவிக்கப்பட்டிருந்த நிலையில் இயற்கையில் திடீர் மாற்றம் ஏற்பட்டுள்ளது.

புயல் உருவாக வாய்ப்பு - பிரதீப் ஜான் கணிப்பு

ஆழ்ந்த காற்றழுத்த தாழ்வுப் பகுதி புயலாக வலுப்பெற வாய்ப்பு உள்ளது. காற்றின் வேகம் 64.8 கி.மீ (35 நாட்ஸ்) இருந்தால் அதனை புயல் எனக் கூறுவோம், தற்போதுள்ள ஆழ்ந்த காற்றழுத்த தாழ்வு மண்டலம் 83 கி.மீ (45 நாட்ஸ்) வரை வலுப்பெற வாய்ப்பு உள்ளது. மேகக் கூட்டங்கள் அடர்த்தியாக உள்ளதாக இன்று பிற்பகல் முதல் மீண்டும் மழையை எதிர்பார்க்கலாம். மரக்காணத்தில் இன்றும், நாளையும் அதி கனமழைக்கு வாய்ப்பிருப்பதாகவும் தனியார் வானிலை ஆய்வாளர் பிரதீப் ஜான் எக்ஸ் தள பதிவில் கூறியுள்ளார். 

ஆழ்ந்த காற்றழுத்தத் தாழ்வு மண்டலத்தால் கொந்தளிக்கும் கடல்

ஆழ்ந்த காற்றழுத்தத் தாழ்வு மண்டலத்தால் காசிமேடு மீன்பிடி துறைமுகத்தில் கடல் சீற்றத்துடன் காணப்படுகிறது. மணிக்கு 45-60கிமீ வேகத்தில் வீசும் காற்றுடன் 2மீ உயரம் வரை அபாயகரமாக அலைகள் மேலெழும்புகிறது.

7 கி.மீ. வேகத்தில் நகரும் தாழ்வு மண்டலம்

வங்கக்கடலில் நிலை கொண்டுள்ள ஆழ்ந்த காற்றழுத்த தாழ்வு மண்டலம் மணிக்கு 7 கி.மீ. வேகத்தில் நகர்கிறது. நாகையில் இருந்து 310 கி.மீ. தொலைவிலும் புதுச்சேரியில் இருந்து 360 கி.மீ. தொலைவிலும் சென்னைக்கு தென்கிழக்கே சுமார் 400 கி.மீ. தொலைவிலும் காற்றழுத்த தாழ்வு மண்டலம் நிலை கொண்டுள்ளது.