மோட்டார் சைக்கிள் மோதி கல்லூரி மாணவர் பலி

வில்லியனூர்

அடுத்தடுத்து 3 வாகனங்கள் மீது மோட்டார் சைக்கிள் மோதிய விபத்தில் கல்லூரி மாணவர் பலியானார்.

கல்லூரி மாணவர்

வில்லியனூர் அருகே உள்ள மூர்த்திநகர் பகுதியை சேர்ந்தவர் முரளி. இவரது மகன் தருண் (வயது 20). இவர் மதகடிப்பட்டு பகுதியில் உள்ள தனியார் மருத்துவ கல்லூரியில் பி.எஸ்சி நர்சிங் 2-ம் ஆண்டு படித்து வந்தார்.

இவர் இன்று காலை வழக்கம் போல் கல்லூரிக்கு மோட்டார் சைக்கிளில் சென்றார். புதுச்சேரி-விழுப்புரம் தேசிய நெடுஞ்சாலையில் வடமங்கலம் பஸ் நிறுத்தம் அருகே சென்ற போது, எதிரே வந்த 2 மோட்டார் சைக்கிள்கள் மீது அடுத்தடுத்து மோதியது.

பலி

இருப்பினும் மோட்டார் சைக்கிள் நிற்காமல், சாலையை கடந்து சென்று லாரி மீது மோதியது. இதில் தூக்கி வீசப்பட்டதில் படுகாயம் அடைந்த தருண் சம்பவ இடத்திலேயே பரிதாபமாக இறந்தார்.

மேலும் மற்ற 2 மோட்டார் சைக்கிளில் வந்த வில்லியனூரை சேர்ந்த குலசேகரன், ரெட்டிக்குளத்தை சேர்ந்த விமல், அவரது மகள் கவிதா (13) ஆகியோர் காயம் அடைந்தனர். அவர்கள் சிகிச்சைக்காக புதுவை அரசு ஆஸ்பத்திரியில் அனுமதிக்கப்பட்டுள்ளனர். விபத்து குறித்து வில்லியனூர் போக்குவரத்து போலீசார் வழக்குப்பதிவு செய்து விசாரணை நடத்தி வருகின்றனர்.