பட்டாசு கடைகள் வைக்க விண்ணப்பிக்கலாம்

புதுச்சேரி

தீபாவளி பண்டிகையையொட்டி பட்டாசு கடைகள் வைக்க விண்ணப்பிக்கலாம் என்று கலெக்டர் வல்லவன் தெரிவித்துள்ளார்.

புதுவை கலெக்டர் வல்லவன் விடுத்துள்ள செய்திக்குறிப்பில் கூறியிருப்பதாவது:-

பட்டாசு கடைகள்

தீபாவளி பண்டிகையை முன்னிட்டு புதுச்சேரி மற்றும் ஏனாம் பகுதிகளில் தற்காலிக பட்டாசு கடை வைக்க விருப்பம் உள்ளவர்கள் புதுவை பேட்டையன்சத்திரம் வழுதாவூர் சாலையில் உள்ள கலெக்டர் அலுவலகத்தில் செப்டம்பர் 8-ந்தேதிக்குள் நேரடியாக விண்ணப்பிக்குமாறு கேட்டுக்கொள்ளப்படுகிறார்கள்.

விண்ணப்பிக்கும்போது புகைப்படம், பட்டாசு விற்பனை செய்ய இருக்கும் இடத்தின் வரைபடம், வரைபடத்தில் கடையில் பட்டாசு வைத்துக்கொள்ளும் அளவு, கடைக்கு செல்வதற்குரிய வழி, சுற்றியுள்ள சாலைகள், கடையை சுற்றி 15 மீட்டர் சுற்றளவில் உள்ள பிற கடைகள் பற்றியும் குறிப்பிட வேண்டும்.

ஆட்சேபனை

சொந்த இடமாக, கடையாக இருப்பின் அதற்குண்டான பதிவு செய்யப்பட்ட ஆவணங்கள், வாடகை இடமாக, கடையாக இருப்பின் வாடகை பத்திரம், பட்டாசுக்கடை வைக்க உரிமையாளரின் ஆட்சேபனை இல்லை என்ற நோட்டரி பத்திரம் மற்றும் மின் கட்டண ரசீது, தண்ணீர் ரசீது, முகவரி மற்றும் அடையாள சான்றுகள் இணைக்கப்பட வேண்டும்.

மேலே குறிப்பிட்ட ஆவணங்களின் நகல்கள் 3 பிரதிகள் விண்ணப்பத்துடன் இணைக்கப்பட வேண்டும். செப்டம்பர் 8-ந்தேதி மாலை 5.45 மணிக்குள் பெறப்பட்ட விண்ணப்பங்கள் மட்டுமே பரிசீலனைக்கு ஏற்றுக்கொள்ளப்படும்.

இவ்வாறு அதில் கூறப்பட்டுள்ளது.