பணம் வைத்து சூதாடிய 6 பேர் கைது

காரைக்கால்

காரைக்கால் நகர் பகுதியான அம்மன்கோவில்பத்து அருகே சிலர் பணம் வைத்து சூதாடுவதாக காரைக்கால் நகர காவல்நிலையத்திற்கு ரகசிய தகவல் கிடைத்தது. அதன்பேரில் இன்ஸ்பெக்டர் புருஷோத்தமன், சப்-இன்ஸ்பெக்டர் மோகன் மற்றும் போலீசார் சம்பவ இடத்திற்கு விரைந்து சென்று சூதாட்ட கும்பலை சுற்றி வளைத்து மடக்கி பிடித்தனர்.

விசாரணையில் அவர்கள், அந்த பகுதியை சேர்ந்த விக்னேஷ் (வயது 23), சிவபாலன் (24), ராஜேஷ் (22), ராமன் (20), அய்யப்பன் (24), ரஞ்சித் (24) ஆகியோர் என்பது தெரியவந்தது. இதையடுத்து 6 பேரையும் போலீசார் கைது செய்தனர். அவர்களிடம் இருந்து ரூ.1,000 மற்றும் சீட்டுக்கட்டுகள் பறிமுதல் செய்யப்பட்டது.