சாலையோர பள்ளத்தில் கார் கவிழ்ந்ததில் ஒரே குடும்பத்தை சேர்ந்த 4 பேர் பலி

ஜெய்ப்பூர்,

ராஜஸ்தான் மாநிலம் ஜோத்பூரில் உள்ள தங்கள் உறவினர்களை சந்தித்துவிட்டு காரில் 6 பேர் சிரோஜி மாவட்டத்தில் உள்ள சியோகஞ்சிற்கு திரும்பிக் கொண்டிருந்தனர். கென்புரா கிராமத்திற்கு அருகே கார் சென்ற போது கட்டுப்பாட்டை இழந்து சாலையோரம் இருந்த பள்ளத்தில் கவிந்தது.

இந்த கோர விபத்தில் 4 பேர் சம்பவ இடத்திலேயே உயிரிழந்தனர். மேலும் 2 பேர் காயமடைந்தனர். தகவலறிந்து சம்பவ இடத்திற்கு வந்த போலீசார், அப்பகுதி மக்கள் உதவியுடன் காரில் சிக்கியிருந்த உடல்களை மீட்டு பிரேத பரிசோதனைக்காக அருகில் உள்ள மருத்துவமனைக்கு அனுப்பி வைத்தனர்.

மேலும் இந்த சம்பவத்தில் காயமடைந்த இருவரும் சந்தேராவ் நகரில் உள்ள அரசு மருத்துவமனைக்கு கொண்டு செல்லப்பட்டனர். அங்கு அவர்கள் சிகிச்சை பெற்று வருகின்றனர்.

இந்த சம்பவம் நேற்று நள்ளிரவு நடந்ததாக போலீசார் தெரிவித்துள்ளனர். கார் அதிவேகமாக சென்றதால் பள்ளத்தில் கவிழ்ந்ததாக போலீசாரின் முதற்கட்ட விசாரணையில் தெரியவந்துள்ளது. இறந்தவர்கள் மராட்டிய மாநிலம் கோலாப்பூரை சேர்ந்த பாபுராவ் (50), அவரது மனைவி சரிகா (38), மகள் சாக்சி (19) மற்றும் மகன் சன்ஸ்கார் (17) என அடையாளம் தெரியவந்துள்ளது.