"குடும்பஸ்தன்" படத்தின் சாட்டிலைட் உரிமையை கைப்பற்றிய பிரபல தொலைக்காட்சி

சென்னை,

தமிழ் சினிமாவில் 'ஜெய் பீம், லவ்வர், குட் நைட்' போன்ற படங்களில் நடித்து பிரபலமானவர் மணிகண்டன். இவரது நடிப்பில் கடந்த 24-ந் தேதி வெளியான படம் 'குடும்பஸ்தன்'. இப்படத்தை சினிமாக்காரன் நிறுவனம் தயாரிப்பில் நக்கலைட்ஸ் யூடியூப் இயக்குனர் ராஜேஷ்வர் காளிசாமி இயக்கியிருக்கிறார். இந்த படத்தில் மணிகண்டன் உடன் இணைந்து சான்வி மேக்னா, குரு சோமசுந்தரம், ஆர் சுந்தர்ராஜன் ஆகியோர் முக்கிய கதாபாத்திரங்களில் நடித்திருக்கின்றனர். இந்த படத்திற்கு வைஷாக் இசையமைத்துள்ளார்.

மிடில் கிளாஸ் குடும்பத்தில் இருக்கும் ஒரு இளைஞனின் வாழ்க்கையில் நடைபெறும் சம்பவங்கள் சுவாரசியங்கள் என அனைத்தையும் இந்த திரைப்படத்தில் காட்சிப்படுத்தி இருக்கின்றனர். இப்படம் விமர்சன ரீதியாகவும் வசூல் ரீதியாகவும் நல்ல வரவேற்பை பெற்று வருகிறது. குடும்பஸ்தன் படம் 6 நாட்களில் ரூ.11 கோடி வசூல் செய்துள்ளதாக கூறப்படுகிறது.

தமிழ் நாட்டில் நல்ல வரவேற்பை பெற்று வரும் இப்படம், வெளிநாடுகளில் ரிலீஸ் செய்யப்பட உள்ளது. இப்படத்தை ஐயங்கரன் இன்டர்நேஷனல்ஸ் தயாரிப்பு நிறுவனம் உலகளவில் வெளியிட்டுள்ளது.

இந்த நிலையில், "குடும்பஸ்தன்" சாட்டிலைட் உரிமையை பிரபல தொலைக்காட்சியான கலைஞர் தொலைக்காட்சி கைப்பற்றியுள்ளது. இப்படத்தின் டிஜிட்டல் ஸ்ட்ரீமிங் உரிமையை ஜீ5 தமிழ் நிறுவனம் கைப்பற்றியுள்ளது குறிப்பிடத்தக்கது.