ஹமாஸ் ஒட்டுமொத்தமாக ஒழிக்கப்படவேண்டும் - ஜோ பைடன்

ஹமாசுக்கு எதிரான போரில் இஸ்ரேலுக்கு அமெரிக்கா நேரடி ஆதரவு தெரிவித்துள்ளது. இதனிடையே, தனியார் செய்தி நிறுவனத்திற்கு அமெரிக்க அதிபர் ஜோ பைடன் இன்று பேட்டியளித்தார்.

அப்போது, இஸ்ரேல் - ஹமாஸ் இடையேயான போர் குறித்து கேள்வி எழுப்பப்பட்டது. அந்த கேள்விக்கு பதில் அளித்த ஜோ பைடன், ஹமாஸ் அமைப்பு ஒட்டுமொத்தமாக ஒழிக்கப்பட வேண்டும். ஆனால், காசா முனையை இஸ்ரேல் ஆக்கிரமிப்பது மிகப்பெரிய தவறாகிவிடும். காசாவில் பாலஸ்தீன அரசு மற்றும் பாலஸ்தீன நாடு அமைவதற்கான வழி தேவை உள்ளது. அதேவேளை, பாலஸ்தீன நாடு அமைவதற்கான வழியை தற்போது இஸ்ரேல் ஏற்றுக்கொள்ளாது.

ஆனால், ஹமாஸ் மற்றும் ஹிஸ்புல்லா பயங்கரவாத அமைப்புகளின் கொள்கைகளை பெரும்பாலான பாலஸ்தீனர்கள் ஏற்றுக்கொள்ளவில்லை என்பதை இஸ்ரேல் விரைவில் புரிந்துகொள்ளும்.

லெபனானில் இருந்து இஸ்ரேலின் வடக்கு எல்லையில் ஹிஸ்புல்லா பயங்கரவாதிகள் தாக்குதல் நடத்துகிறார்கள். இந்த தாக்குதலுக்கு ஈரான் ஆதரவு அளிக்கிறது. அவர்களுக்கு நான் கூறுவது என்னவென்றால் தாக்குதல் நடத்த வேண்டாம். போரை நீட்டிக்க வேண்டாம்’ என்றார்.