மகளிர் ஒருநாள் கிரிக்கெட்; இங்கிலாந்தை வீழ்த்தி வெற்றி பெற்ற தென் ஆப்பிரிக்கா

கிம்பர்லி,

இங்கிலாந்து மகளிர் கிரிக்கெட் அணி தென் ஆப்பிரிக்காவுக்கு சுற்றுப்பயணம் மேற்கொண்டு 3 டி20, 3 ஒருநாள் மற்றும் ஒரு டெஸ்ட் போட்டி கொண்ட தொடரில் ஆடி வருகிறது. இதில் முதலில் நடைபெற்ற டி20 தொடரை 3-0 என்ற கணக்கில் இங்கிலாந்து கைப்பற்றியது. இதையடுத்து இவ்விரு அணிகள் இடையிலான ஒருநாள் தொடர் இன்று தொடங்கியது.

இரு அணிகளுக்கும் இடையிலான முதல் ஒருநாள் போட்டி இன்று நடைபெற்றது. இந்த ஆட்டத்தில் முதலில் பேட்டிங் செய்த இங்கிலாந்து 38.4 ஓவர்களில் அனைத்து விக்கெட்டுகளையும் இழந்து 186 ரன்னுக்கு ஆல் அவுட் ஆனது. இங்கிலாந்து தரப்பில் அதிகபட்சமாக சார்லி டீன் 47 ரன்கள் எடுத்தார். தென் ஆப்பிரிக்கா தரப்பில் மரிசான் கேப், அன்னேரி டெர்க்சன் ஆகியோர் தலா 3 விக்கெட்டுகள் வீழ்த்தினர்.

தொடர்ந்து 187 ரன் என்ற இலக்கை நோக்கி ஆடிய தென் ஆப்பிரிக்கா 38.2 ஓவர்களில் 4 விக்கெட்டை மட்டும் இழந்து 189 ரன்கள் எடுத்து 6 விக்கெட் வித்தியாசத்தில் அபார வெற்றி பெற்றது. தென் ஆப்பிரிக்கா தரப்பில் லாரா வோல்வார்ட் 59 ரன்கள் எடுத்தார். இந்த வெற்றியின் மூலம் 3 போட்டிகள் கொண்ட ஒருநாள் தொடரில் தென் ஆப்பிரிக்கா 1-0 என முன்னிலையில் உள்ளது. இரு அணிகளுக்கும் இடையிலான 2வது ஒருநாள் போட்டி வரும் 8ம் தேதி டர்பனில் நடக்கிறது.