மாநில கூடைப்பந்து: அரைஸ், ரைசிங் ஸ்டார் அணிகள் 'சாம்பியன்'

சென்னை,

ரைசிங் ஸ்டார் கூடைப்பந்து கிளப் சார்பில் 17-வது மாநில கூடைப்பந்து போட்டி சென்னை தியாகராயநகர் வெங்கட்நாராயணா ரோட்டில் உள்ள மாநகராட்சி திடலில் நடந்தது. இதன் ஆண்கள் பிரிவின் இறுதி லீக் ஆட்டத்தில் அரைஸ் அணி 96-93 என்ற புள்ளி கணக்கில் இந்தியன் வங்கியை வீழ்த்தி சாம்பியன் பட்டத்தை கைப்பற்றியது.

அரைஸ் அணியில் சூர்யா 29 புள்ளிகளும், ஆனந்த் 26 புள்ளிகளும் எடுத்தனர். இந்தியன் வங்கி 2-வது இடம் பெற்றது. மற்றொரு ஆட்டத்தில் லயோலா அணி 93-84 என்ற புள்ளி கணக்கில் எஸ்.டி.ஏ.டி.யை சாய்த்து 3-வது இடத்தை தனதாக்கியது. லயோலா அணியில் அபினாஷ் 31 புள்ளிகளும், சுபின் வேல் 15 புள்ளிகளும் சேர்த்தனர். எஸ்.டி.ஏ.டி. 4-வது இடம் பெற்றது.

பெண்கள் பிரிவின் கடைசி லீக் ஆட்டத்தில் ரைசிங் ஸ்டார் அணி (சென்னை) 68-67 என்ற புள்ளி கணக்கில் எஸ்.பி.சி. அணியை பதம் பார்த்து சாம்பியன் பட்டத்தை தனதாக்கியது. ரைசிங் ஸ்டார் அணியில் கிருத்திகா 20 புள்ளிகளும், ஏஞ்சல் ஜீவிதா, நிவேதா ஸ்ரீ தலா 11 புள்ளிகளும் எடுத்தனர். எஸ்.பி.சி. அணி 2-வது இடம் பெற்றது. இன்னொரு ஆட்டத்தில் இந்துஸ்தான் ஜாமெர்ஸ் 58-39 என்ற புள்ளி கணக்கில் தமிழ்நாடு போலீசை தோற்கடித்து 3-வது இடத்தை சொந்தமாக்கியது. இந்துஸ்தான் அணியில் சங்கமித்ரா 19 புள்ளிகளும், தலிதா 16 புள்ளிகளும் சேர்த்தனர். தமிழ்நாடு போலீஸ் 4-வது இடம் பிடித்தது.

பரிசளிப்பு விழாவில் எம்.ஓ.பி.வைஷ்ணவா கல்லூரி முதல்வர் லலிதா பாலகிருஷ்ணன், சென்னை மாவட்ட கூடைப்பந்து சங்க தலைவர் சினோரா அசோக் ஆகியோர் கலந்து கொண்டு வெற்றி பெற்ற அணிகளுக்கு பரிசு வழங்கினர். முதல் 4 இடங்களை பிடித்த அணிகளுக்கு முறையே ரூ.40 ஆயிரம், 30 ஆயிரம், ரூ.20 ஆயிரம், ரூ.10 ஆயிரம் ரொக்கப்பரிசாக வழங்கப்பட்டது. தமிழ்நாடு கூடைப்பந்து சங்க செயலாளர் அஜிஸ் அகமது, போட்டி அமைப்பு குழு செயலாளர் சம்பத் உள்பட பலர் விழாவில் கலந்து கொண்டனர்.